Governu gasta rihun $30 sosa produtu lokál aprezenta iha espozisaun Osaka
DILI, 09 Jullu 2025 (TATOLI)—MinistériauTurizmu no Ambiente (MTA) liuhusi Diresaun Jerál Turizmu sei gasta orsamentu ba preparasaun sosa produtu lokál ne’ebé atu aprezenta iha espozisaun Osaka-Japaun ho montante rihun $30 ne’ebé prevee husi Orsamentu Jerál Estadu (OJE) 2024.
Diretór Jerál Turismu, António da Silva, hateten produtu ne’ebé Governu sosa hahú kedas iha tinan-2024 to’o agora ne’ebé kompostu husi munisípiu sia (9), inklui produtu sira husi grupu artesanatu no sosiedade sivíl sira-nian, no daudaun ne’e Governu nia preparasaun iha hela faze trata viza no billete aviaun nian.
“Espozisaun Osaka ita hatene katak ne’e hahú iha Abríl ne’e no sei ramata iha Outobru. Entaun, Governu mós prepara sekuénsia atividade lubuk ida mak atu aprezenta iha ne’ebá hanesan aprezentasaun dansa kultura, aprezenta potensialidade turismu, agrikultura no minerál ba iha loron nasionál partisipante nian,” Diretór Jerál ne’e hateten ba Agência Tatoli, iha salaun enkontru DJT, haksolok Group, Villa Verde, ohin.
Normalmente iha loron nasionál Timor-Leste nian monu iha loron 28 Agostu ne’ebé ita sei halo atividade durante loron tolu husi dadrer to’o kalan. Entaun Governu mós prepara ona tenda (stand) tolu iha espozisaun Osaka, ne’ebé sei prienxe husi Parte Agrikultura, turizmu no minerál nian.
“Liuhusi espozisaun ne’e fó oportunidade mai ita atu mundu tomak bele koñese produtu Timor nian tanba iha espozisaun ne’e la’ós hetan partisipasaun de’it husi Timor-Leste maibé partisipa mós husi nasaun seluk,” membru Governu ne’e hatutan.
Nia dehan, tuir planu sei konvida membru Parlamentu Nasionál, membru Governu ne’ebé relevante ho espozisaun, ida-ne’e espesialmente iha setór ekonómika nian hodi partisipa iha espozisaun Osaka-Japaun.
“Espozisaun Osaka ne’e la’o kapaas tebe-tebes no ha’u rasik sei ba semana ida-ne’e, inklui ita-nia Xefe Estadu ne’ebé sei halo traballu ofisiál iha Japaun no sei liuhusi Osaka,” Vise Primeiru-Ministru, Ministru Koordenadór Asuntu Ekonómiku, Ministru Turismu no Ambiente, Francisco Kalbuadi Lay, hateten.
Ministru Turismu no Ambiente ne’e informa, enkuantu bainhira to’o selebrasaun loron nasionál Timor-Leste nian iha Osaka ne’ebé sei hala’o iha Agostu nia laran, sei fó oportunidade ba mídia balun hodi partisipa iha atividade refere.
“Tanba ida-ne’e Governu mak organiza entaun partisipante ne’e husi nasaun hotu-hotu no sei la lori empreza,” nia esplika.
Produtu ne’ebé Governu sosa husi munisípiu
Governu Konstitusionál da-sia (9) sosa produtu lokál sira iha kada munisípiu ne’ebé atu aprezenta iha Espozisaun Osaka-Jepang mak hanesna tuir mai ne’e;
Ataúru: Boneka tradisionál, maskara tradisionál,
Lautein: Kabas, fatin soru tais, selendang.
Baukau: La’o rai (songe), uma adat.
Manatutu: Sanan-rai, babadok, kakehe akadiru, lafatik, kohe (luhu)
Oekusi: Selendang Oekusi, karteira tais, xafe kakehe akadiru, gantungan xave kiik, kelu produtu,
Likisa: Korrente tais, kelu tais, kiu tau osan rahun, ai-funan hoban ho akadiru, raga tau ai-funan, kulseira.
Dili: Kaebauk, mortel, livru separatór, ulsuku, kadeli-mutin, kelu-mutin, bringkus babadok, kelu-tais, keke mutin no mean, fotográfia potensiál turizmu tasi-laran, vazu tais, pink pank bandeira, bandalete tais kapriliu nu’u, manu-fulun no seluk tan.
Ermera: Kafé, pimenta metan, koto.
Kovalima: Selendang tais.
Produtu husi Grupu artesanatu no sosiedade sivíl
Rede Soru Nain: Alas kopu Lauten.
Things Stores: Kaixa kazak hena, pasta, keramik fatin, gift box no seluk tan.
Fundasaun Alola: Kopu buli halo uza rai, pasta no seluk tan.
Jornalista : Alexandra da Costa
Editór : Cancio Ximenes
