Semestre dahuluk 2025, Notariadu Bobonaru halibur reseita $73.875
BOBONARU, 10 Jullu 2025 (TATOLI)—Hahú husi semestre dahuluk (Janeiru-Juñu) tinan 2025 ne’e, Diresaun Servisu Konservatóriu Rejistu Notariadu Delegasaun Territoriál Munisípiu Bobonaru halibur reseita hamutuk $73.875 hodi kontribui ba kofre Estadu.
Diretór Servisu Konservatóriu Rejistu Notariadu Delegasaun Territoriál Munisípiu Bobonaru, Marciano Mali Loe informa reseita hirak-ne’e halibur liuhusi atividade atendimentu pasaporte komún.
“Hahú Janeiru to’o Juñu, ita atende ema na’in-1.388 kompostu husi mane 830, feto 568 ho orsamentu $73.875,” nia hateten ba jornalista sira iha nia kna’ar-fatin, kinta ne’e.
Notisia Relevante: Rejistu Notariadu Bobonaru rekolla reseita $43,525 iha trimestre dahuluk
Nia haktuir katak daudaun ne’e atendimentu pasaporte depende ba oráriu husi Diresaun Jerál Konservatóriu Rejistu Notariadu tanba problema ho CISCO.
“Ita hein informasaun husi nasionál mai. Kada fulan atendimentu bele dala lima ka dala neen de’it. Oráriu la permanente. Kada oráriu ne’e ita atende de’it ema na’in-15,” Marciano esplika.
Enkuantu, prosesu atendimentu ba sidadaun ne’ebé hakarak trata pasaporte ba loron ida selu iha Banku Nasionál Komérsiu Timor-Leste (BNCTL-sigla portugeza) ho valór orsamentu $100, loron tolu $75 no loron sanulu $50.
Jornalista: Sergio da Cruz
Editór: Xisto Freitas Piedade
