Estadu TL fó fiar ba Ivo Valente hala’o misaun diplomasia iha Angola
DILI, 11 Jullu 2025 (TATOLI)–Estadu Timor-Leste liuhusi Prezidente Repúblika, José Ramos Horta, fó fiar ba Eis-Ministru Justisa Ivo Valente hodi reprezenta Timor-Leste hala’o misaun diplomasia iha nasaun Angola.
Prezidente Repúblika, José Ramos Horta, sesta ne’e, ó pose ba Ivo Jorge Valente nu’udár Embaixadór Estraordináriu no Plenipotensiáriu foun Repúblika Demokrátika Timor-Leste nian ba Repúblika Angola, iha Palásiu Prezidensiál Nicolau Lobato, Bairru Pite, Dili.
Tomada de posse ba Embaixadór Valente subliña importánsia ne’ebé buras daudaun ba relasaun diplomátika Timor-Leste nian ho Angola, harii iha lasu istóriku entre nasaun rua ne’ebé ko’alia lian portugés.
“Nomeasaun ba Embaixadór Ivo Jorge Valente reprezenta kapítulu foun ida iha ita-nia relasaun diplomátika ho Angola. Ninia esperiénsia kle’an iha lei no governasaun, kombina ho ninia komprensaun kle’an kona-ba nesesidade dezenvolvimentu ita-nia nasaun nian, sei sai hanesan instrumentál hodi avansa parseria forte ne’ebé ita harii ona ho ita-nia maun-alin Angolanu sira. Nomeasaun ne’e reforsa ita-nia kompromisu atu hametin ligasaun sira iha família CPLP no fortalesimentu ita-nia istória partiál husi luta ba independénsia hodi harii futuru ida-ne’ebé prósperu ba ita-nia povu rua,” PR Horta hateten iha nia diskursu bainhira fó pose ba Embaxadór Valente.
Nomeasaun ne’e reflete Prezidente Horta nia kompromisu atu hametin Timor-Leste nia parseria internasionál sira no avansa objetivu polítika esterna nasaun nian liuhusi lideransa diplomátika ne’ebé iha esperiénsia.
Iha okaziaun ne’e, Embaxadór Ivo Valente hato’o agradesementu ba Prezidente Repúblika, José Ramos Horta no Governu Timor-Leste ne’ebé lidera husi Primeiru-Ministru, Kay Rala Xanana Gusmão ne’ebé fó ona konfiansa ba nia hodi reprezenta Timor-Leste iha Angola hanesan Embaixadór.
“Agradese ba Prezidente Repúblika Governu ne’ebé mak tau ona konfiansa mai ha’u atu reprejenta Estadu Timor-Leste iha Angola. Iha ne’ebá ha’u sei hala’o servisu importante ne’ebé atu hametin liutan relasaun entre nasaun rua,” Ivo hateten.
Nia dehan, Angola nasaun ida-ne’ebé antes ne’e apoiu maka’as tebes Timor-Leste nia luta ba libertasaun no agora kontinua apoiu ba Timor-Leste nia prosesu dezenvolvimentu.
“Servisu importante ne’ebé mak ha’u sei halo ho apoiu parte hotu nian. Ita sei haree setór potensiál sira, ita bele kolabora no koopera ba oin. Ita mós ho istoria metin tebes ho nasaun CPLP sira liuliu Angola, Iha Angola potensiál ba mina-rai, entaun ita haree oinsá bele halo kooperasaun ida kona-ba ne’e, tanba ita mós iha rekursu mina-rai,” nia dehan.
Tanba ne’e, durante hala’o misaun iha Angola sei la haree de’it ba poténsia ekonomia, maibé sei haree mós ba área hotu ne’ebé poténsia ba Timor-Leste nia interese Embaixadór ne’e sei lobi hodi hala’o kooperasaun atu tulun Timor-Leste nia dezenvolvimentu.
Embaixadór Valente lori esperiénsia jurídika no diplomátika ne’ebé kle’an ba ninia kna’ar foun, nia serbi ona iha pozisaun nivel aas oioin iha Governu Timor-Leste nian, inklui hanesan Ministru Justisa (2015-2017) no Vise-Ministru Justisa (2010-2015).
Ninia esperiénsia komprensivu iha direitu, administrasaun públika, no asuntu internasionál koloka nia ho di’ak atu avansa Timor-Leste nia interese iha Angola no hametin relasaun bilaterál entre nasaun rua ne’e.
Timor-Leste no Angola iha ligasaun istóriku ne’ebé kle’an iha sira-nia luta ba libertasaun nasionál no kompromisu atu hasa’e sira-nia kooperasaun iha ámbitu Komunidade Países Língua Portuguesa (CPLP) nian.
Área sira ne’ebé iha interese ba malu inklui dezenvolvimentu setór petróleu no gás, asuntu seguransa rejionál, no apoiu ba ida-idak nia esforsu multilaterál, inklui esforsu integrasaun ASEAN Timor-Leste nian.
Relasaun ne’e signifikativamente hametin liuhusi marku diplomátiku sira foin lalais ne’e, inklui inaugurasaun embaixada Timor-Leste nian iha Luanda iha Jullu t2024 no estabelesimentu embaixada Angola nian iha Dili iha Maiu 2025.
Jornalista : Hortencio Sanchez
Editór : Cancio Ximenes
