DILI, 16 Jullu 2025 (TATOLI)—Sekretariu Estadu Arte Kultura (SEAK) no atuál Koordenadór Jerál ba Jogu Desportivu Nasaun Sira Ko’alia Lian Portugés (CPLP, sigla portugés), Jorge Soares Cristovão, informa tuir ajenda ne’ebé iha, kuarta (17 Jullu) ne’e, delegasaun nasaun haat (4) husi Afrika to’o ona Timor-Leste hodi partisipa jogu desportivu CPLP maibé tanba kestaun aviaun seidauk bele to’o no adia fali ba loron aban.
Notísia Relevante: Preparativu ba jogu desportivu CPLP termina ona
Delegasaun nasaun haat (4) ne’ebé viajen hamutuk mak hanesan Angola, Cabo Verde, São Tome e Prinsipe no Mosambike.
“Tuir loloos nasaun haat (4) husi Afrika to’o ona Timor-Leste ohin, tanba ita trata hotu ona sira nia vistu ohin to’o Bali kontinua kedan mai Timor-Leste, maibé ohin madrugada ita simu kontaktu no sira rasik fó sai husi sira-nia komunikadu katak sira labele kontinua semo tanba kestaun aviaun, entaun sira tenke fila-fali no ohin la konsege to’o Timor-Leste,” Governante ne’e hateten ba Agência Tatoli liuhusi prpograma “Entreveista Eskluziva” ho tópiku “Preparativu IKus ba Jogu Desportivu CPLP” iha estúdiu Faról, kuarta ne’e.
Tanba ne’e, tuir nia, nasaun haat (4) referidu konfirma fali sei hala’o viajen iha kuarta (16 Jullu) ohin no to’o iha Dili-Timor-Leste iha sesta (18 Jullu) hodi partisipa iha jogu desportu CPLP ne’ebé realiza iha Timor-Leste.
“Maibé, ekipa ida ne’ebé sei to’o aban ne’e mak Portugál, bainrua nasaun seluk mak sei to’o,” nia hateten.
Tuir dadus ne’ebé iha, delegasaun ne’ebé sei to’o Timor-Leste mak Angola sei mai ho ema hamutuk 105 inklui árbitru, médiku no tékniku balun tan, Cabo Verde sei mai ho ema hamutuk 87 ne’ebé sei partisipa modalidade hotu maibé taekwondo mak sira la partisipa, Guiné-Bissau ema hamutuk 61, Mosambike ema hamutuk 70, Portugál 101, São Tomé e Prínsipe 35 no Timor-Leste hamutuk ema 101.
Jornalista : Hortencio Sanchez
Editór : Cancio Ximenes
