DILI, 18 Jullu 2025 (TATOLI) – Atleta timoroan na’in-haat husi modalidade voleiból praia preparadu atu reprezenta nasaun iha Jogu Desportivu Komunidade Nasaun Ko’alia Lian Portugés (CPLP, iha portugés), ne’ebé sei hala’o entre loron 20 to’o 24 Jullu ne’e.
Ekipa ne’e komposta husi atleta maskulina rua no femenina rua: Noeh Deo Gracias Sequeira (15), Felisberto Bento Faria da Silva (16), Miguelia Pereira Ximenes Belo (13) no Augusta Belo da Silva (16).
Vise-Prezidente Federasaun Voleiból Timor-Leste, Afonso Amaral de Almeida, hateten preprasaun husi selesaun Timor-Leste (TL) iha ona pontu másimu no hanesan federasaun garante dezempeñu efikás, efisiente no sei hatudu rezultadu di’ak ba públiku.
“Ha’u-nia mesajen ba jogadór sira hanesan tenke iha esperansa hanesan timoroan, maibé husu mós iha jogu ne’e labele buka mak manán de’it, maibé hatudu jogu ne’ebé profisionál. Ida-ne’e mak importante, hodi hatudu ba mundu katak ita eziste”, nia afirma.
Atleta Noeh Sequeira espresa nia orgullu tanba bele reprezenta Timor-Leste iha modalidade voleból praia iha Jogu CPLP no nia espera bele manán hodi fó medalla ba nasaun. “Sente orgullu tebes partisipa iha jogu ne’e. Esforsu hela atu hatudu performa di’ak iha jogu ne’e atu manán no hetan medalla”, nia dehan ba Tatoli, ohin.
Hodi salienta katak nia preparasaun ba jogu ne’e kuaze tinan ida no treinu efetivu liu besik fulan tolu. “Ha’u fiar serbisu ekipa ami sei manán”, nia otimista.
Iha sorin seluk, nia kolega Felisberto Bento Faria, fahe nia sentimentu katak foin ba dahuluk partisipa iha jogu ne’e. “Ho treinu ne’ebé ami halo durante ne’e, sei garante lori medalla osan-mean ba Timor-Leste”, heteten ho fiar an.
Miguelia Pereira Ximenes Belo mós hatudu nia otimizmu: “Maski jogu ne’e iha manán no lakon, maibé ba ha’u-nia rai doben, ha’u ho kolega sira luta no sei manán”, nia hateten.
No mós Augusta Belo da Silva destaka nia laran-haksolok bele partisipa iha voleiból praia no fiar katak ho esforsu maka’as sei lori rezultadu pozitivu.
Maski sira hotu mesak estudante no agora iha tempu ezame, maibé treinu ida-ne’e la afeta ba sira-nia estudu, tanba sesaun ne’e feita depois oras eskola. Treinu ne’e to’o horisehik iha kampu voleiból praia Lesidere no ohin entrega fali ba atleta sira husi rai-li’ur.
Xefe Arbitrajen Voleiból Praia Timor-Leste, Evaristo Cabral, afirma katak preprativu tékniku ba jogu nian konklui ona, inklui arbitrajen.
“Kona-ba arbitrajen ita iha nasionál na’in-sia no internasionál haat. Ami hela iha otél Timór hahú 17 to’o 28 Jullu 2025. Ba atleta timoroan sira hothotu hela iha otél Ramelau”, dehan.
Jogu voleiból praia ne’e iha kategoria tolu – kompetisaun feto, mane no mistu (feto-mane). Nasaun neen mak sei kompete mak hanesan Timor-Leste, Portugál, Mosambike, Kabuverde, Angola, no Saun Tomé no Prinsípe.
Jornalista: Arminda Fonseca
Editora: Maria Auxiliadora
