DILI, 21 Jullu 2025 (TATOLI)—Iha jogu Modalidade Atletizmu nian, atleta husi Portugál, Samuel Butarita Rodrigues konsege halakon atleta na’in-lima iha korida metru 1500 (maskulinu) ho durasaun tempu 4:12.13.
Durante kompetisaun, atleta hotu-hotu preparadu no halai ho velosidade ne’ebé mak lais, la rende, maibé atleta Portugál hetan oportunidade liu hodi konkista vitória iha kompetisaun ida-ne’e.
Entretantu, atleta husi Kabuverde, Alerson Patrick Nascimento Silva sai segundu lugár no atleta Timor-Leste, Júlio Martins Amaral okupa terseiru lugár.
“La fásil atu sai vensedór tanba atleta sira seluk ne’ebé ami kompete hamutuk la’ós baibain maibé mesak selesionadu hotu, maski nune’e agradese tanba bele manán,” Samuel Butarita Rodrigues espresa nia sentimentu bainhira jornalista sira halo entrevista iha Estádiu Dili, Segunda ne’e.
Nia dehan vitória ida-ne’e hanesan primeiravéz nia hetan iha nivel internasionál, entaun ne’e esperiénsia di’ak ida ba nia hodi aprende no bele koñese tan atleta husi nasaun seluk.
Notísia relevante: Atleta Portugál na’in-hitu halibur medalla iha kompetisaun atletizmu
Nune’e mós, atleta timoroan, Júlio Martins Amaral sente orgullu tanba bele hetan terseiru lugár iha jogu referidu.
“Kontente tebes bele hetan medalla tanba ida-ne’e sai hanesan kompetisaun internasionál dahuluk mai ha’u,” nia argumenta.
Nia hein katak iha futuru mai sei eaforsu di’ak liután no fiar katak treinadora Odete Belo bele fó treinu sira ho másimu, nune’e bele mellora di’ak liután sira-nia tátiku no estratéjia sira.
Atleta sira-ne’ebé kompete iha klase korrida metru 1500 (maskulinu) kompostu husi Lucas Oscar Lourenço de Castro husi Angola, Veldenizio Correia De Jesus husi Timor-Leste, Samuel Butarita Rodrigues husi Portugál, Alerson Patrick Nascimento Silva husi Kabuverde, Romândio Romário Gomes Marino husi Kabuverde no Júlio Martins Amaral husi Timor-Leste.
Jornalista : Alexandra da Costa
Editór : Cancio Ximenes
