Margarida sai primeiru lugar iha modalidade atletizmu “lançamento de peso”
DILI, 21 Jullu 2025 (TATOLI)—Iha modalidade atletizmu klase lançamento de peso nian, Margarida Braz Simões Bento husi nasaun Portugál, sai primeiru lugar ho pontu 13,7 hafoin kompete ho atleta na’in-tolu (3) seluk husi nasaun sira seluk iha jogu desportiva komunidade país ko’alia lian portugés (CPLP) da da-XII.
Atleta Portugál, Margarida Braz Simões Bento, sente kontente tebes bainhira sai manán-na’in ba iha klase ida-neʼe maibé labele para de’it iha ne’e, espera bele mellora di’ak liután iha tempu tuir mai tanba nia mós aprende barak kona-ba kultura desportu iha Timor.
“Ohin, ha’u hatudu duni performe ne’ebe mak di’ak tanba durante ne’e ha’u-nia treinu ho másimu tebes. Ha’u bele oferese vitória ne’e ba ha’u-nia nasaun no la saugate nasaun hili ha’u hodi compete,” atleta ne’e informa ba jornalista sira iha estádiu Munisipál Dili, Audian, ohin.
Maske nune’e, nia dehan, ladun toman ho klima Timor nian ne ebé mak manas tebes, dalaruma mós sai difikuldade ba nia maibé nia nafatin esforsu hodi hetan rezultadu ne’ebé mak di’ak ba kompetisaun ohin loron.
Atleta husi Cabo Verde okupa fatin sai segundu lugar, Sacha Elaine Pires Semedo, halibur pontu 7,67 no iha terseiru lugar ne’e okupa husi husi atleta Angola, Domingas Antónia Fernandes Nkai ho totál pontu 8,21.
Atleta husi nasaun Cabo Verde, Sacha Elaine Pires Semedo, hateten maske sai vensedora daruak no la konsege sai manán-na’in dahuluk ba kompetsisaun ida-ne’e maibé sente di ak tanba ida- ne’e ninia esforsu.
“Tanba ida-ne’e hanesan primeiravés mai ha’u hodi kompete, entaun orgullu boot mai ha’u. Husi ne’e, ha’u bele aprende no sei mellora di ak liután iha tempu tuir mai,” nia dehan.
Durante kompetisaun ne’e, atleta sira hatudu ida-idak nia tátiku tuda pesu todan nian, ne’ebé mak lahanesan maibé atleta sira konsege hatudu performe di’ak hodi manán ho valór ne’ebé mesak boot.
Entretantu atleta sira-ne’ebé kompete iha klase ne’e mak hanesan Margarida Braz Simões Bento husi nasaun Portugál, Joviana dos Reis da Costa husi nasaun Timor-Leste, Domingas Antónia Fernandes Nkai husi nasaun Angola no atleta Sacha Elaine Pires Semedo husi nasaun Cabo Verde.
Jornalista : Alexandra da Costa
Editór : Cancio Ximenes
