DILI, 21 Jullu 2025 (TATOLI)— Nasaun partisipante tolu, Portugál, Angola, no Cabo Verde asegura pontu iha torneiu Xadrez klásiku (padraun) ba ekipa mane iha ronda dahuluk ba Jogu Desportivu CPLP XII ne’ebé hala’o iha Sentru Konvensaun Dili (CCD).
Jogu ne’e hahú kedas iha tuku 15:00 Oras Timor-Leste no marka jogu abertura ba série jogu xadrez nian ne’ebé sei la’o to’o loron 25 fulan Jullu.
Iha kategoria mane nian, Timor-Leste reprezenta hosi Rivanho Viegas ho klasifikasaun 1655, Mosambike husi Denilson Felipe Simbine, Portugal husi Matviy Faryma ho klasifikasaun 2230.
Nune’e mos jogador Angola reprezenta husi Célio Alexandre David Tchilulu ho klasifikasaun 1750, Cabo Verde husi Celton Manuel Sousa Ramos no São Tomé e Príncipe husi Daniel da Costa Fernandes Ramos.
Iha jogu abertura segunda ne’e (21/07), Angola halakon São Tomé e Prínsipe iha tuku 16:10 oras Timor-Leste, Cabo Verde halakon Mosambike iha tuku 17:46 oras Timor-Leste, no tuir kedas ho Portugál ne’ebé halakon Timor-Leste iha tuku 17:48 oras Timor-Leste.
Ronde dahuluk ne’e hatudu dezempeñu maka’as hosi jogadór sira ne’ebé di’ak liu, inklui Matviy Faryma hosi Portugál, ne’ebé kaer klasifikasaun aas liu entre partisipante sira ho pontu 2,230.
Torneiu Xadrez iha Jogu desportivu CPLP XII 2025 ne’e ofisialmente Koordenadór Jogu Desportivu CPLP no atuál Sekretáriu Estadu Arte no Kultura, Jorge Cristovão (SEAK) Timor-Leste, Jorge Soares Cristovão. Akompaña husi Francisco Carapinha, Prezidente Federasaun Xadrez Cabo Verde, no Zeferino Viegas Tilman, Prezidente Federasaun Xadrez Timor-Leste.
Jogu Xadrez fahe ba kategoria tolu: padraun (klásiku), rápidu, no blitz. Série jogu sira nian hahú hosi loron 21 to’o 25 fulan-Jullu tinan 2025.
Segunda volta sei hala’o iha loron 22 fulan Jullu, ho ronda dalimak hodi determina vensedór finál. Jogu ida-idak sei ofisializa hosi árbitru na’in sia hosi Timor-Leste no árbitru internasionál na’in haat hosi Portugal, São Tomé e Prínsipe, no Cabo Verde.
Jornalista : Cidalia Fátima
Editora : Armandina Moniz
