DILI, 21 Jullu 2025 (TATOLI)–Iha Jogu Desportivu Komunidade País Lian Portugés (CPLP-sigla portugeza) ba dala-XII 2025, kompetisaun Modalidade Atletizmu iha loron dahuluk ne’ebé hala’o iha Estádiu Munisipal Dili, Segunda ne’e, Portugál domina iha klasifikasaun dahuluk ho medalla osan-mean (ouru) lima (5) no medalla osan-mutin (prata) rua (2).
Medalla hirak-ne’ebé Portugál rekolla kompostu husi klase lansamentu pezu (tuda todan) ne’ebé atleta Margarida Bráz Simões Bento mak konkista medalla osan-mean ida, iha klase korrida metru 100 (feminina) atleta Portugál mak konkorre hotu husi primeiru lugár lidera husi Laura Branco Jorge da Silva (medalla ouru) no segundu lugár lidera husi Leonor Silva de Freitas (medalla prata).
Iha klase korrida metru 3000 okupa husi Maria Clara Monteiro (medalla ouru), iha klase korrida 1500 (maskulinu) lidera husi atleta Samuel Butarita Rodrigues (medalla ouru) no iha klase korrida metru 100 (maskulinu) nafatin okupa husi atleta na’in-rua husi Portugál, Miguel Martinho de Almeida (medalla euru) no Tiago André Barros dos Santos (medalla prata).
Iha klasifikasaun daruak nian okupa husi Kabuverde ne’ebé rekolla medalla osan-mutin (prata) tolu no osan-metan (bronze) rua. Medalla osan-mutin konkista husi atleta Silvanilda Carina Delgado Gomes ne’ebé kompete iha klase korrida metru 100 (feminina) ne’ebé sai segundu lugár. Marina Cibele Rodrigues Delgado hetan segundu lugar (medalla osan-mutin) hafoin kompete iha klase korrida metru 3000 (feminina), atleta Sacha Elaine Pires Semedo konkista segundu lugár iha kompetisaun lansamentu pezu 3kg no rekolla medalla osan mutin (prata), Keny Alexandre Semedo Ramos hetan terseiru lugár no rekolla medalla osan-metan bainhira kompete iha klase korrida metru 100 (maskulinu), enkuantu Alerson Patrick Nascimento Silva hetan terseiru lugár (medalla osan-metan) hafoin kompete iha klase korrida metru 1500 (maskulinu).
Notísia relevante: Portugál kontinua domina iha kompetisaun atletizmu korrida metru 100
Enkuantu, iha klasifikasaun datoluk okupa husi uma-na’in Timor-Leste ne’ebé rekolla medalla osan-metan (bronze) rua no atleta ne’ebé konkorre ba medalla ne’e mak hanesan Deonita Fátima Amaral Xavier ne’ebé sai terseiru lugár hafoin kompete iha klase korrida metru 3000 (feminina) no medalla ida seluk konkorre husi atleta Júlio Martins Amaral ne’ebé kompete iha klase korrida metru 1500 (maskulinu).
Ikusliu, iha klasifikasaun dahaat, okupa husi Angola ne’ebé konkista medalla osan-metan (bronze) ida, ne’ebé manán husi atleta Domingas Antónia Fernandes Nkai ne’ebé okupa iha terseiru lugár ba kompetisaun klase lansamentu pezu 3kg (tuda todan).
Rezultadu husi jogu Modalidade Atletizmu ba loron dahuluk nian okupa husi Portugál ne’ebé rekolla medalla hitu (7), segundu lugár okupa husi Kabuverde ne’ebé rekolla medalla lima (5), terseiru lugár okupa husi Timor-Leste ne’ebé rekolla medalla rua, kuartu lugár okupa husi Angola ne’ebé rekolla medalla ida (1) no nasaun sira seluk seidauk rekolla medalla ruma iha kompetisaun loron dahuluk nian.
Jornalista : Alexandra da Costa
Editór : Cancio Ximenes
