DILI, 22 Jullu 2025 (TATOLI) – Ekipa voleiból praia femenina husi Timor-Leste hakat ba semifinál hafoin halakon Kabuverde iha Jogu Desportivu Komunidade País Ko’alia Lian Portugés (CPLP).
Iha kompetisaun ne’e, Timor-Leste reprezenta husi Miguelia Pereira Ximenes (1) no Augusta Belo (2), enkuantu Kabuverde mak Catarina Fonseca (3) no Maria Clara Lima (4).
Iha set dahuluk Timor-Leste manán ho pontu 21 no Kabuverde 12. Ho rezultadu jogu ne’e iha set daruak, ekipa Kabuverde koko hadau pontu balun husi Timor-Leste, maibé uma-na’in kontinua domina, nune’e hetan vitória ho pontu 21 no Kabuverde 16.
Hafoin termina jogu atleta, Miguelia Pereira Ximenes, agradese tebes tanba Timor-Leste bele hakat ba jogu semifinál, ne’ebé sei realiza iha aban.
“Ho rezultadu ohin, ami tenke prepara an di’ak liután, tanba tama semifinál no finál sei hasoru ekipa forte sira, liuliu Portugál. Ba rai Timor-Leste ami sei manán”, nia garante.
Nune’e atleta Augusta Belo hateten durante jogu esperiénsia barak mak sira hetan husi atleta sira husi nasaun adversária. Ho ida-ne’e sira-nia parte sei hadi’ak liután tátika sira, liuliu baku bola. “Ami garante sei manán ba iha jogu voleiból”, afirma.
Treinadór no Koordenadór Voleiból Praia Timor-Leste, Mario Bento Soares, rekoñese katak iha loron jogu dahuluk lakon, maibé ida-ne’e hanesan esperiénsia, liuliu treinadór sira oinsá hanorin tátika oioin ba jogadór sira hodi manán.
Tuir nia, ekipa feto-mane Timor-Leste iha jogu ohin manán hotu no sei hakat ba semifinál. Iha Jogu ne’e asiste direita husi Prezidente Repúblika José Ramos Horta.
Notísia relevante: Miguela no Noeh lori Timor-Leste manán iha kompetisaun voleiból mistu
Jornalista: Arminda Fonseca
Editora: Maria Auxiliadora
