Ekipa saúde atende atleta no adeptu hamutuk 28 durante jogu CPLP
DILI, 24 Jullu 2025 (TATOLI) – Ekipa Nasionál Saúde ba jogu desportiva CPLP halo ona atendimentu ba atleta no adeptu hamutuk 28 no husi ne’e maioria Timoroan.
“Ita-nia atendementu ba atleta sira, ba adeptu sira hotu, sira ne’ebé mai asiste jogu sira-ne’e iha loron 19 to’o 22. Iha loron 19 ne’e, ita atende pasiente hamutuk 12. Sira-ne’e Timoroan hotu,” Koordenadór Komisaun ba Pesoál Saúde ne’ebé atende jogu desportiva CPLP, Simplicio Amaral dehan iha kampu tenis, UNTL Liseu,ohin.
“Iha abertura, na’in rua mak ita evakua ba sentru saúde Formoza no sentru saúde Vera krús, agora ida ita evakua ba sentru saúde Formoza ne’e avó ida mais ou menus tinan-60 itál, nia tanba dezmaia no dudu malu ho joven sira barak. Ida mak idade-40 anos resin, ida-ne’e mai ho ulun moras maka’as ho isin-manas, entaun ita-nia ekipa sira halo atendementu, maibé isin-manas la tuun nafatin entaun ita evakua kedas ba sentru saúde Vera krús,” koordenadór ne’e haktuir.
Nia relata, iha loron 20 iha pasiente na’in-haat mak ekipa sira halo atendimentu, husi ne’e ida atleta Portugál husi modalidade atletizmu, nia trauma, no sira-nia médiku halo atendementu maibé la pasa, entaun sira lori ba HNGV, no agora di’ak ona, até agora só Portugés ida mak iha HNGV, restante ne’e ita halo atendementu iha kada modalidade sira.
“Iha loron 22 ita atende pasiente hamutuk sia, entre nasaun sira-ne’e Kabuverde rua, sira-ne’e tanba aintuur moras, entaun ita-nia ekipa halo atendementu no fó ai-moruk, entaun di’ak. Sira-ne’e maioria husi modalidade atletizmu tanba sira halai maka’as entaun para sira oin halai no dezmaia, entaun ita-nia ekipa sira halo kedas atendementu,” pesoál saúde ne’e esplika.
Husi abertura to’o loron 22 ne’e totál pasiente hamutuk 28 maioria timoroan hotu, entre sira-ne’e Portugál ida, Mosambike na’in-rua ho Kabuverde na’in-tolu.
Iha loron 23, iha pasiente ida mak médiku sira tau soru tanba feto ida husi atletizmu nia oin halai, entaun mediku sira fó ai-moruk no di’ak fila fali.
Iha loron 24, ekipa saúde mós halo atendimentu ba atleta timoroan ne’ebé trauma iha liman-sikun iha jogu modalidade tenis. “Ida ohin ne’e, nia trauma iha nia liman-sikun, artikulasaun iha ne’e, tanba nia movimentu maka’as nia baku tenis maka’as, dalaruma jogu ne’e hahú trauma ki’ikoan sira-ne’e nia hasoru ona, tanba ne’e mak ohin nia baku maka’as ne’e afeta liu ba nia artikulasaun ne’e ho nia estrutura anatomia iha liman sikun sira-ne’e ho nia u’at no tendor ligamentu sira-ne’e hotu”.
“Tanba, ohin ita haree liman rua ne’e, ha’u koko halo komparasaun liman rua ne’e la hanesan tiha ida bubu ho kle’uk tanba ne’e presiza nafatin halo fisioterapia ba iha ita-nia atleta ida-ne’e liuliu ba iha tenis nian ,” nia hatutan.
Ho nune’e, ekipa halo kedas primeiru sokorru hodi hakalma ninia moras ne’e, maibé depois kompetisaun tenis ne’e ramata médiku sira sujere ba ospital nune’e bele terapia halo di’ak liután.
Jornalista : Felicidade Ximenes
Editór: Rafael Ximenes de A. Belo
