AMB sei kria kondisaun molok muda negosiante Ili-bole
BOBONARU, 25 Jullu 2025 (TATOLI)—Autoridade Munisipál Bobonaru (AMB) iha tempu badak sei halo koordenasaun ho Institutu Jestaun Ekipamentu Apoia Dezenvolvimentu Infraestrura, Institutu Públiku (IGEADI, I.P-sigla portugeza) Brigada Maria-Tapó atu ateru halo tetuk rai iha merkadu lokál Ili-bole nia kotuk molok muda negosiante sira.
“Ita buka hela meiu para oinsá kria fatin ruma para sira bele muda liuliu kona-ba rai tanba iha ne’ebá kondisaun rai ne’e sira atu muda ba kotuk mós naruk uitoan, ne’ebé ita presiza ateru tiha depois mak ita muda sira sai husi fatin ne’e,” Sekretáriu Autoridade Munisípiu Bobonaru ba Asuntu Planeamentu no Dezenvolvimentu Integradu, Semedo Laco informa ba jornalista sira iha Salaun Maria-Tapó, Bobonaru, Sesta ne’e.
Notisia Relevante: Governu fó prazu fulan ida ba negosiante hamamuk merkadu Ili-bole
Antes ne’e, Governu liuhusi Autoridade Munisípiu Bobonaru fó tempu prazu fulan ida ba negosiante sira iha merkadu lokál Ili-bole hahú loron 21 Jullu to’o loron 30 Agustu 2025 ne’e tenke hamamuk fatin, tanba atividade negósiu iha fatin referida okupa espasu públiku no ba futuru sei afeta ba alargamentu estrada diresaun kapitál Maliana vila ba Postu Administrativu Bobonaru no Lolotoe.
Notifikasaun ne’e bazeia ba Dekretu-lei númeru 33/2008, 27 Agustu, artigu 4 númeru 3 kona-ba atividade komersiál labele taka estrada públika no trotoár sira.
Enkuantu, negosiante sira-ne’ebe daudaun ne’e halo negósiu kuaze 20-resin maihusi Suku Oe-leu, Postu Administrativu Bobonaru no Suku Odomau ho Suku Raifun, Postu Administrativu Maliana.
Jornalista: Sergio da Cruz
Editór: Xisto Freitas Piedade
