DILI, 25 Jullu 2025 (TATOLI) – Portugál hato’o nia agradesimentu kle’an ba ospitalidade husi Timor-Leste (TL) ba delegasaun tomak ne’ebé partisipa iha eventu desportivu Komunidade País Ko’alia Lian Portugés (CPLP, sigla portugés) ba da-XII, ne’ebé realiza iha Dili.
Ministra Kultura, Juventude no Desportu Portugál, Margarida Balseiro Lopes, hato’o hafoin enkontru ho Primeiru-Ministru (PM), Xanana Gusmão, iha Palásiu Governu, ohin.
Nia prezensa iha Timor-Leste ne’e reprezenta Governu Portugál iha okaziaun eventu desportivu CPLP, nomós atu partisipa iha Reuniaun Ministru Kultura, Juventude no Desportu CPLP iha prósimu domingu, iha Dili.
“Klaru ami iha oportunidade atu agradese ba primeiru-ministru ba ospitalidade tomak ne’ebé Timor hatudu ona ba Portugál, nune’e mós ba delegasaun CPLP sira hotu. Ita mós bele rekoñese afetu boot tebes ne’ebé Portugál iha ba Timór, no liuliu ba Primeiru-Ministru Xanana Gusmão”, Margarida Balseiro Lopes hateten.
Nia dehan durante estadia iha Timor-Leste sei assiste direta jogu desportivu oioin iha eventu CPLP, no sente kontente tanba Portugál iha avansu maka’as iha jogu hirak ne’e liuhusi vitória barak.
“Maibé, buat ne’ebé importante liu bá ha’u mak ida-ne’e hanesan oportunidade no momentu importante hodi hametin lasu amizade ne’ebé ita, tanba ita ko’alia lian komún ida [portugés]. Maibé, ita iha relasaun metin tempu naruk no amizade ida-ne’e kle’an tebes entre nasaun sira ne’e, liuliu domin boot husi Portugál ho Timór”, konklui.
Jornalista: Arminda Fonseca
Editora: Maria Auxiliadora
