VIKEKE, 28 Jullu 2025 (TATOLI)—Organizasaun Internasionál Care iha Timor-Leste implementa ona projetu tolu iha Munisípiu Vikeke hodi fó apoiu ba komunidade.
Reprezentante Care Interasionál iha Timor-Leste, Neliana Sousa haktuir durante ne’e Care servisu iha fatin barak inklui iha Munisípiu Vikeke.
“Daudaun ne’e ami implementa projetu tolu iha Munsípiu Vikeke. Projetu ida mak revista Lafaek ne’ebé mak ami fahe bá eskola sira hodi ajuda estudante no manorin sira kona-ba literásia no numerásia. Projetu daruak mak reziliénsia klimátika ne’ebé foka liubá mudansa klímatika sira hodi responde ba mudansa klímatika no projetu ikus mak Covid-19 liuliu haforsa sistema saúde (CHOSIS) responde ba saúde emerjénsia,” Neliana hateten iha sorumutu entre reprezentante Care no autoridade sira iha Salaun Ti’ilou, Postu Vikeke Vila, Segunda ne’e.
Neliana esplika katak implementsaun projetu iha Vikeke Care servisu hamutuk ho autoridade lokál, parseiru no komunidade iha baze.
“Ami hato’o agradesimentu ba autoridade Munisípiu Vikeke ne’ebé koopera ho Care ba implementasaun projetu sira iha munisípiu ida-ne’e,” nia hato’o.
Iha fatin hanesan, Xefe Gabinete Autoridade Munisípiu Vikeke, Luís António da Silva Soares hato’o agradesimentu ba Care ne’ebé implementa projetu sira iha Munisípiu Vikeke tanba bele ajuda komunidade.
“Projetu CHOSIS ne’ebé implementa kuaze tinan-tolu iha Munisípiu Vikeke ajuda ita-nia komunidade liuliu ba preparasaun saúde emerjénsia nian. Tan ne’e, ha’u hein katak bá-oin Care bele implementa tan iha Vikeke no autoridade munisípiu prontu koopera ho parseiru dezenvolvimentu sira,” nia hato’o.
Partisipa iha sorumutu husi Administradór Postu Uatulari, Diretór Servisu Munisipál, Komandante Autoridade Protesaun Sivíl (APC-sigla portugeza), Xefe Suku, Fundasaun Knua Haberan Komunidade (KHC-sigla portugeza).
Jornalista: Vitorino Lopez da Costa
Editór: Xisto Freitas da Piedade
