Komjer PNTL halo impozisaun diviza ba membru na’in-hitu iha Bobonaru
BOBONARU, 28 Jullu 2025 (TATOLI)—Komandante Jerál (Komjer) Polísia Nasionál Timor-Leste (PNTL), Komisáriu Polísia Henrique da Costa, Segunda ne’e, halo impozisaun diviza ba membru PNTL na’in-hitu iha Kuartél Komandu PNTL Munisípiu Bobonaru.
Membru hirak-ne’e hetan impozisaun diviza ho kategoria promosaun tranzitória na’in-tolu kompostu husi Postu Primeiru Sarjentu ba Sarjentu Xefe, Postu Ajente Xefe ba Primeiru Sarjentu no Postu Ajente Xefe ba Sarjentu Xefe.
Enkuantu, na’in-ha’at hetan promosaun bazeia ba atiguidade husi Postu Ajente ba Ajente Prinsipál na’in-tolu no Ajente Prinsipál ba Ajente Xefe na’in-ida.
“Ohin imi tula diviza ne’e la’ós prémiu ida, maibé esforsu, dedikasaun, profisionalizmu ne’ebé mak imi hatudu ba rai ida-ne’e, hatudu ba povu no ba ita nia instituisaun mak Governu konsidera hodi atribui diviza ida-ne’e ba imi liuhusi promosaun diviza tranzitória no pur antiguidade,” Komisáriu Henrique hateten iha serimónia referida.
Notísia relevante: Membru PNTL Oekusi na’in-130 hetan promosaun tranzitóriu diviza
Iha biban ne’e, Komandante PNTL Munisípiu Bobonaru, Superintendente Xefe Augusto Gomes da Silva informa katak tuir loloos membru na’in-hitu ne’e hetan promosaun diviza iha loron 08 fulan-Maiu liubá maibe la konsege tanba kestaun disiplinár.
“Maibé hafoin ida-ne’e Komandu observa no avalia sira-nia disiplina, sira-nia profisionalizmu, lealdade no responsabilidade ba servisu ne’ebé la’o, tan ne’e laiha tan nesesidade atu halo demoramentu ba sira-nia promosaun diviza,” nia tenik.
Komandante ho diviza aifunan-tolu ne’e esklarese promosaun ne’e sai motivasaun no inspirasaun ne’ebé aas hodi serbí povu no nasaun di’ak liután.
Antes ne’e, membru Komandu PNTL Munisípiu Bobonaru na’in-141 hetan impozisaun diviza husi Postu Ajente ba to’o Asistente Superintendente Polísia.
Jornalista: Sergio da Cruz
Editór: Xisto Freitas da Piedade
