OEKUSI, 22 Maiu 2025 (TATOLI)– Governu liuhusi Ministru-Interiór, kinta ne’e, halo empozisaun diviza promosaun tranzitóriu no promosaun pór antiguidade ba membru Polísia Nasionál Timor-Leste (PNTL) na’in-130 iha Rejiaun Administrativa Espesiál Oekusi Ambeno (RAEOA).
Desizaun promove diviza membru PNTL bazeia ba Rejime Transzitóriu no tuir antiguidade neʼebé define iha Estatutu PNTL, aprova husi Dekretu-lei númeru 35/2024, loron 18 Outubru.
Aleinde ne’e, bazeia ba despaxu Governu liuhusi Ministériu Interior (MI) numéru 14/G-MI/III/2025 kona-ba Promosaun Tranzitória PNTL no despaxu Komandu PNTL númeru 239/CG-PNTL/IV/2025 kona-ba Promosaun Postu Ajente Prinsipál no Ajente Prinsipál ba Ajente Xefe
Entretantu, membru PNTL promosaun diviza na’in-130 ne’e komposta husi Unidade Patrollamentu Fronteira (UPF) kompañia Charly Oekusi na’in-haat, Batallon Ordén Públika (BOP) na’in-neen.
Kompozisaun ba promosaun ne’e mak hanesan, ofisiál superior na’in-neen, ofisiál subalterno komposta husi inspetór xefe na’in-lima, inspetór na’in-hitu, inspetór asistente na’in-20, ba sarjentu kompostu husi sarjentu xefe na’in-29, primeiru sarjentu na’in-55 no ajente xefe na’in-10
Bibab ne’e, Ministru Interiór, Francisco da Costa Guterres, hateten Governu atribui diviza ne’e la’ós prémiu, maibé valorizaun ba dedikasaun durante tinan barak serbí iha instituisaun PNTL, nune’e nia husu atu kontinua hatudu disipliña no ierarki komando nian no hatudu responsabilidade.
“Imi simu diviza ne’e la’ós prémiu husi sé de’it ne’e mai husi valorizasaun ba servisu ne’ebé ita-bo’ot sira halo durante tinan 20-resin ona, balu tinan 10, ariska ita bo’ot sira nia vida iha situasaun difisíl atu fó seguransa ba estabilidade povu iha ita-nia rai, tan ne’e mak impozisaun diviza liuhusi promosaun ne’e atu valoriza servisu ita-bo’ot sira-nian, ne’ebé husu disipliña nafatin no respeita ierarkia komandu nian,” nia apela iha kuartel PNTL Oekusi.
Notísia relevante:Komandu jerál PNTL fó orientasaun pontu lima ba komandante munisípiu
Tuir Governante ne’e, katak iha situasaun defisíl krize 2006, PNTL barak mak ariska nia vida iha situasaun moruk ne’e la hanoin família no vida tomak, maibé hanoin liu mak responsabilidade povu sira, hodi fó seguransa ba Estadu nian liuliu ba orgaun soberanu sira hotu, nune’e oragun sira bele servisu ho di’ak, atu hakatliu situsaun ne’e.
“Tan ne’e, Governu ho Estadu presiza merese atu valoriza imi-nia dedikasaun ne’e,” nia afirma.
Presiza lealdade no profisionál
Entretantu, Komandante Jerál PNTL, Komisáriu Jerál Polísia, Hendrique da Costa, promosaun diviza ne’e, atu fó motivasaun ba PNTL sira hodi servi no proteze di’akliu povu no nasaun ne’e.
“Saida mak ita atu halo tenke asegura responsabilidade ne’ebé fó ba ita liuhusi diviza ne’ebé atribui mai ita atu halo servisu, respeita nafatin ierarkia komandu nian, respeita komunidade tanba diviza ne’ebé ita hetan atu serbí no proteze sira, la’os atu foti-an no halo an, la’os atu kria arogansia, maibé responsabilidade,” Komandante ne’e apela.
Nia fó ezemplu, membru balun uluk sarjentu ou primeiru sarjentu balun ajente xefe, maibé promosaun tranzitóriu ne’e, ajente xefe haksoit liu fali sarjentu sira, ida-ne’e hanesan mudansa ida ba servisu fatin, tanba uluk komanda maibé agora sai fali komandante.
“Ida ne’e situsaun ne’ebé mak, akontese no husu imi tenke nafatin respeita ierarkia komandu, la’os foin simu ona diviza, aban orienta depois haksesuk malu tanba mudansa ne’e, maibé instituisaun militár tenke dixipliña no lealdade, ne’e amk importante,” nia fó hanoin.
Notísia relevante:Membru PNTL 2000-resin sei hetan promosaun diviza
Alende ne’e, Prezidente Autoridade RAEOA, Rogério Tiago Lobato, hato’o agradese ba Governu liuhusi polítika Ministériu Interiór, tanba foin dahuluk Timor-Leste halo promosaun diviza tranzitóriu ba PNTL sira.
“Uluk primeiru Governu, ha’u mak lidera Ministériu Interiór, no ami mak fó naran PNTL ne’e, husi ne’ebé to’o ohin, hahú mudansa maka’as ona, ha’u agradese tanba Governu ida-ne’e, bele halo promosaun ba ita-nia seguránsa sira atu dignifika sira nia dedikasaun. ha’u-nia esperansa ba PNTL sira, atu mantein nafatin ordén dixipliña, atu mantein ierarkia, ne’e mak importante ba ita-nia forsa seguránsa,” dehan Prezidente Autoridade RAEOA.
Notísia relevante:MI sei solisita Konsellu Ministru halo Promosaun ba Ofisiál Superiór PNTL
Jornalista: Abílio Elo Nini
Editór: Florencio Miranda Ximenes
