SEKOMS apela ofisiál mídia labele okupa kna’ar hanesan jornalista
DILI, 29 Jullu 2025 (TATOLI)—Sekretáriu Estadu Komunikasaun Sosiál (SEKOMS), Expedito Loro Dias Ximenes, apela ba ofisiál mídia (media oficer) iha liña ministeriál sira tenke iha étika hodi labele taka dalan jornalista sira-nia servisu bainhira partisipa iha atividade nasionál ruma no tau-an hanesan mídia ofiser la’ós hanesan jornalista.
Tanba, nia hatutan, ofisiál mídia sira-nia funsaun mak oinsá atu hakerek kona-ba komunikadu imprensa no kolleta dadus informasaun ne’ebé relasaun ho atividade instituisaun ninia kna’ar loro-lororn.
“Dalaruma hanesan superiór husi instituisaun ida ba partisipa atividade nasionál ka eventuál ruma, ofisiál mídia tenke hasai de’it ninia superiór nia foto hotu fila ona ba li’ur, la’ós okupa fali servisu jornalista nian. Tanba, iha atividade sira-ne’e sempre destaka jornalista nasionál hodi halo kobertura,” Sekretáriu Estadu ne’e informa ba jornalista sira iha salaun Maria Gorrete SEI, Kaikoli, ohin.
Aleinde ne’e, tuir nia, ofisiál mídia tenke prepara dadus konkreta kona-ba instituisaun nian, nune’e hafasíl ba superiór hodi transmite informasaun no ema seluk bele asesu informasaun husi pájina ofisiál institusionál nian.
“Imi iha oportunidade másimu bainhira imi-nia instituisaun mak realiza atividade ruma, ne’e eseptu maibé fora husi atividade nasionál ne’ebé akumulu liña ministeriál sira hotu. Imi labele halo kobertura másimu tanba ne’e jornalista sira-nian,” nia esplika.
Buat sira-ne’e akontese tanba dalabarak ona iha atividade nasionál sira liuliu fotografer ofisiál mídia sira destaka barak liu, maibé ita tenke hatene katak ofisiál mídia lahanesan ho jornalista tanba jornalista loro-loron sai ba buka kualker informasaun hodi fó sai ba públiku, maibé ofisiál mídia hakerek de’it informasaun ne’ebé relasiona ho atividade instituisaun nian.
Iha biban ne’e, tuir partisipante mídia ofisiál, Sekretária Estadu Eletrisidade Água no Saneamentu, Deonizia Tilman dos Reis, hateten iha enkontru ida-ne’e fó benefísiu tebes ba nia hodi hatene kle’an kona-ba servisu ofisiál mídia nian.
“Tanba dalabarak ema ladun halo komparasaun didi’ak entre jornalista no ofisiál mídia, nune’e nia sei hala’o nia servisu tuir papél ne’ebé iha atu labele okupa jornalista nia servisu iha atividade boot ruma,” nia dehan.
Entretantu, iha atividade ne’e partisipa husi ofisiál mídia sira hotu ne’ebé hakna’ar-an iha liña ministeriál sira.
Jornalista : Alexandra da Costa
Editór : Cancio Ximenes
