Governu sei harii banku dezenvolvimentu fó kréditu ba empreza kiik sira
DILI, 30 Jullu 2025 (TATOLI)—Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, hateten Governu iha inisiativa hodi estabelese banku dezenvolvimentu ne’ebé sei ajuda fó kréditu ba empreza kiik sira.
“Estabelesimentu banku dezenvolvimentu ho objetivu atu dudu empreza kiik-oan sira no fó kbiit ba sidadaun hotu atu asesu lalais ba kapitál,” Vise Primeiru-Ministru ne’e informa ba públiku bainhira prienxe programa Meet the Press ne’ebé realiza husi Sekretária Estadu Komunikasaun Sosiál iha salaun MTK, Kaikoli, tersa ne’e (29 Jullu 2025) ne’e.
Antes ne’e, nia dehan, Kompetisaun Planu Negósiu Inovadór (KPNI) ne’ebé IADE lansa ne’e importante tanba Governu nia kompromisu atu promove inovasaun ho emprezáriu nu’udár xave ida ba diversifikasaun ekonómika no kreximentu sustentavel iha Timor-Leste.
Tuir nia, KPNI ba tinan ne’e hanesan plataforma ida atu prepara joven mane no feto sira-ne’ebé ho abilidade koñesementu rekursu atu dezenvolve planu negósiu ba iha kompetisaun.
Governu aliña ba kompetisaun programa ekonómiku nian liuliu ba setór prioridade sira hanesan agrikultura, turizmu no indústria.
Nia promote, ba oin MKAE sei haree apoiu kréditu ba partsipante 400 neʼebé tuir kompetisaun ne’e hodi ajuda sira-nia planu negósiu ruma.
Kompetisaun Planu Negósiu 2025 ne’e, MKAE sei apoiu mós orsamentu rihun $15, nune’e husu ba IADE ho ekipa halo selesaun didi’ak ba partisipante sira.
“Haree didi’ak ida-ne’ebé presiza ajuda. Ita tenke ajuda tanba ita apoiu liuhusi mikro ekonómiku, tanba bainhira emprezáriu kiik sira la’o ona maibé la depedente ba ema seluk. Sira mós harii rasik sira-nia negósiu ho di’ak husi kiik no futuru bele sai negosiante boot. Tanba inovasaun nu’udár katalista ba kreximentu no inovasaun nu’udar dalan ida ba susesu,” nia dehan.
Jornalista : Alexandra da Costa
Editór : Cancio Ximenes
