BOBONARU, 30 Jullu 2025 (TATOLI)—Komunidade no autoridade lokál sira husu Governu atu aselera prosesu aprovizionamentu ba projetu reabilitasaun estrada liga husi Suku Oe-leu bá Suku Kolimau, Postu Administrativu Bobonaru, Munisípiu Bobonaru tanba fízikamente kondisaun estrada ne’e grave.
Xefe Suku Male-Ubu, Quintiliano Barros Fernandes informa estrada ne’e iha tempu udan difikulta tebes komunidade atu asesu ba Postu Admitrativu Bobonaru no kapitál munisípiu.
Líder komunitáriu ne’e preokupa tanba kondisaun estrada ne’e aat kuaze tinan barak ona no líder órgaun sobaranu sira mós haree rasik ona matan, maibé to’o agora nafatin aat liuliu iha tempu udan.
“Ha’u hanoin estrada ne’e ita rasik observa, membru Governu barak inklui Prezidente Repúblika mós observa rasik,” nia informa ba TATOLI iha lokál traballu, Kuarta ne’e.
Aleinde ne’e, Komunidade Suku Lourba, António de Jesus fiar katak Governu sei tau prioridade iha tempu badak.
“Ami presiza mak estrada ne’e tanba tempu udan ami la’o bá-mai araska. Ezemplu, foin horikalan de’it udan kois estrada nakonu ho tahu no bee nakonu iha estrada laran halo motór barak mak monu no kareta ki’ik balun mós mout,” nia haktuir.
Notísia relevante: Komunidade husu Governu hadi’a Estrada Oe-Leu
Enkuantu, iha Kuarta (30/07/2025), tuir projetu sira-ne’ebé aprezenta hosi Ministru Obra Públika, Samuel Marçal, Konsellu Ministru delibera atu autoriza despeza no abertura ba ninia prosedimentu aprovizionamentu hodi halo ezekusaun ba projetu reabilitasaun infraestrutura rodoviária haat kompostu husi reabilitasaun estrada nasionál, iha seksaun entre kruzamentu Lourba (Bobonaru), Atsabe no kruzamentu Letefoho (Ermera), ho naruk kilómetru 48.93 no kustu ne’ebé prevee millaun $47,9.
Reabilitasaun ba estrada nasionál, iha seksaun entre Maliana, Kailaku no Ponte Marobo (Munisípiu Bobonaru), ho naruk kilómetru 26 no kustu ne’ebé prevee millaun $25,6.
Reabilitasaun estrada munisipál, iha seksaun entre kruzamentu Bobonaru no Lolotoe Vila, ho naruk kilómetru 8,9 no kustu ne’ebé prevee $13,8.
Reabilitasaun ba estrada urbana Likisá, ho naruk kilómetru 20 no kustu ne’ebé prevee millaun 19,8.
Governu mós fó instrusaun ba Komisaun Nasionál Aprovizionamentu hodi hahú etapa sira tuirmai hosi prosedimentu kontratasaun públika nian, tuir lejizlasaun ne’ebé vigora.
Jornalista: Sergio da Cruz
Editór: Xisto Freitas da Piedade
