BOBONARU, 01 Agustu 2025 (TATOLI)–Ministériu Defeza liuhusi FALINTIL-Forsa Defeza Timor-Leste (F-FDTL), Sesta ne’e, lansa fatuk-dahuluk konstrusaun uma solidariedade unidade ida ba inan-faluk Aquelina Bui Mali (63) ho oan-ki’ak Juliana Bui (31) iha Aldeia Sekar, Suku Holsa, Postu Administrativu Maliana, Munisípiu Bobonaru.
Uma ne’e sei konstrui husi forsa enjiñaria F-FDTL hodi komemora ezisténsia Forças Armadas da Libertação Nacional de Timor-Leste (FALINTIL) ba dala-50, 20 Agustu 1975-20 Agustu 2025.
Notísia relevante: Governu aprova projetu rezolusaun ba komemorasaun aniversáriu FALINTIL da-50
Xefe Gabinete Xefe Estadu Maiór F-FDTL, Koronél da Infantaria, Marcelino Ximenes ‘Rizay’ hateten ohin ita marka loron ida ho signifikadu kle’an ne’ebé nakonu ho esperansa tanba obra ne’e simboliza nasaun nia kompromisu ba dignidade no moris di’ak sidadaun hotu-hotu ninian.
“F-FDTL ninia ezisténsia tomak hala’o kna’ar hodi defende ita-nia rai, soberanu no povu nia liberdade, maibé nia servisu la’os de’it protesaun iha sentidu militár ho soberania militár, maibé hamriik hanesan ai-riin ba apoiu no solidariedade ba ita-nia komunidade,” nia hateten iha intervensaun iha lansamentu fatuk dahuluk.
Koronél haktuir katak la’ós konstrui de’it iha Bobonaru maibé mós iha Munisípiu Aileu, Ainaru, Baukau no Lautein.
Tuir Xefe Gabinete ne’e katak uma sira-ne’e simboliza dignidade no esperansa ne’ebé populasaun hein.
Iha fatin hanesn, Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio de Carvalho Caeiro apresia ho polítika Ministériu Defeza liuhusi F-FDTL ne’ebe iha hanoin atu hadi’ak no hamoris faluk ho oan-ki’ak sira iha komunidade nia leet.
“Durante ne’e ami hanoin mmabé forsa la to’o, entaun ho programa ida-ne’e ajuda ona parte autoridade ne’ebé durante ne’e hosoru difikuldade no dezafiu barak. Ami husu bá-oin atu kontinua tan tanba ami iha-ne’e faluk ho oan-ki’ak, kbiit laek mós barak. Ita reforsa malu hodi hadi’a sira-nia moris,” nia dehan.
Entretantu, benefisiária Aquelina Bui Mali agradese ba Governu liuliu Komandu F-FDTL tanba ajuda realiza mehi atu hetan uma dignu ne’ebé durante ne’e sira mehi.
“Ha’u moris ne’e naan mós laiha, inan-aman mós mate hotu ona. Ha’u moris mesak. Ne’e mak agora ha’u terus no susar. Ha’u halo to’os mós labele ona. Ha’u túr iha fatin de’it. Ha’u atu bá-mai mós ladi’ak. Ida-ne’e mak Estadu kala hanoin tau-matan mai ha’u,” nia hateten ho matabeen.
Uma referida iha kuartu tolu, sala rua, dapur no kompletu ho hariis-fatin.
Jornalista: Sergio da Cruz
Editór: Xisto Freitas da Piedade
