SSM Vikeke rejista pesoál saúde na’in-19 sei tama ba reforma
VIKEKE, 01 Agustu 2025 (TATOLI)—Diretór Servisu Saúde Munisípiu (SSM) Vikeke, Aljaksono Soares Maia informa SSM Vikeke halo identifikasaun ba pesoál saúde hamutuk na’in-19 ne’ebé idade tama ona ba reforma iha tinan 2026.
“Ami rejista ona ba pesoál saúde sira-ne’ebé idade 65 ba leten ne’e hamutuk na’in-19. Komisaun Funsaun Públika fó-sai ona katak sei akontese reforma obrigatória akontese iha tinan oin (2026). Nune’e, ba Munisípiu Vikeke ami idetifika hotu ona. Hein tinan oin tama reforma,” Aljaksono Soares Maia ba TATOLI iha ninia kanar fatin, Vikeke Vila, Sesta ne’e.
Diretór SSM Vikeke ne’e relata pesoál saúde na’in-19 ne’ebé atu tama reforma ne’e maioria enfermeiru antigu ne’ebé hahú servisu iha tempu okupasaun Indonézia to’o agora sira kontinua komtribui servisu ba apoia asistensia saúde ba komunidade sira iha Munisípiu Vikeke.
“Bainhira sira-ne’e tama ona vida reforma, sei difikulta servisu saúde iha Munisípiu Vikeke, nune’e agora daudaun ami halo ona mapeamentu rekursu nian no mapeamentu rekursu ami hatama ona ba Ministériu Saúde (MS). Tinan oin pesoál saúde sira-ne’e tama reforma. Ita iha ona mapeamentu hodi rekruta fali enfermeiru foun hodi substitui fatin sira-ne’ebé mamuk,” Aljaksono haktuir.
Nia tenik pesoál saúde na’in-19 ne’e durante ne’e destaka iha Ospitál Internamentu Vikeke Vila, Sentru Saúde lima no postu saúde sira hodi fó atendimentu ba komunidade.
Tuir dadus, pesoál saúde na’in-19 kompostu husi Sentru Saúde Uatulari na’in-lima (5), Sentru Saúde Ossú na’in-rua (2), Sentru Saúde Laklutan a’in-tolu (3) no Sentru Saúde Vikeke Vila na’in-sia (9).
Jornalista: Vitorino Lopez da Costa
Editór : Xisto Freitas da Piedade
