BOBONARU, 04 Agostu 2025 (TATOLI)—Komunidade preokupa ho implementasaun projetu manutensaun ponte no estrada hahú husi área Bupira, Suku Lahomea, Postu Administrativu Maliana ba to’o Postu Administrativu Bobonaru, Munisípiu Bobonaru, tanba obra ne’e implementa durante tinan-ualu (8) liu ona más to’o agora seidauk finalizadu.
Projetu emerjénsia ne’ebé implementa dezde 2017 ne’e, iha tinan kotuk Ministru Obra Públika, Samuel Marçal, deside hadi’a dezeñu no Bill of Quantities (BOQ) nune’e bele garante kualidade no dura ba tempu naruk, tanba kompañia implementa projetu laiha koordenasaun di’ak ho Ministériu Obra Públika (MOP).
“To’o agora projetu ne’e paradu hela. Kompañia ne’e halo ponte ida iha Hali-Mesak ne’e mós seidauk uza, agora dehan hadi’a fali dezeñu. Ne’ebé, ami hanoin di’akliu Governu hapara de’it ona. Hein projetu foun mak halo fali tanba foin lalais téknika Obra Públika nian mai halo ona levantamentu dadus. Ita espera tinan oin halo ona,” abitante Manuel de Jesus Pires informa ba TATOLI iha Ili-bole, Segunda ne’e
Aleinde ne’e, motorista jamioneta, Justino Mau Leto prefere di’akliu implementa mak projetu reabilitasaun tanba manutensaun de’it la natoon atu fasilita movimentasaun públika.
Notísia relevante: MOP halo levantamentu dadus topografia estrada Maliana-Bobonaru
Justino sente triste tanba projetu ne’e mai ho karater emerjénsia maibé servisu lentu.
“Tinan-tinan ami Bobonaru ho Lolotoe ne’e sempre preokupa mak estrada sa’e mai ne’e, agora Institutu Jestaun Ekipamentu normaliza ho karater emerjénsia tan ne’e di’ak uitoan ona. Se lae udan mai kareta ki’ik, boot, motor fali mós susar atu ultrapasan tanba tahu maka’as,” nia haktuir.
Tuir observasaun TATOLI iha terrenu nota katak armazein kompañia sei iha hela lokál projetu, maibé ekipamentu ho materiál laiha no servisu paradu hela.
Obra ne’e responsabiliza husi kompañia lokál Vieramor Unipessoal, Lda ho valór kontratu $2.060.737,42.
Jornalista: Sergio da Cruz
Editór: Xisto Freitas da Piedade
