DILI, 06 Agostu 2025 (TATOLI) – Sekretária Estadu Komunikasaun Sosiál (SEKOMS) hamutuk ho Konsellu Imprensa Timor-Leste (KITL, sigla portugés) halo enkontru preliminár hodi aborda prinsípiu jerál revizaun lei komunikasaun sosiál.
Sekretariu Estadu Komunikasaun Sosiál, Expedito Loro Dias Ximenes, hateten, ita hotu akompaña esplikasaun iha semana hirak liubá, entaun ohin Governu liuhusi Sekretária Estadu Komunikasaun Sosiál (SEKOMS) halo enkontru preliminár diskusaun kona-ba revizaun lei komunikasaun sosiál.
“Ohin iha diskusaun dahuluk, ami konkorda malu katak presiza atu hakle’an liután revizaun ne’e iha nia estrutura lejislasaun nian”, Sekretáriu Estadu ne’e informa ba jornalista sira iha salaun enkontru SEKOMS, Palásiu Governu, ohin.
Tanba ne’e, Governante énfaze katak ohin sira halo de’it diskusaun preliminár no seidauk tama iha nia substánsia revizaun nian.
“Nune’e ami hotu konkorda katak iha semana oin sei diskute artigu sira no substánsia husi revizaun lei ne’e rasik, importante maka parte rua ne’e konkorda katak presiza duni atu halo revizaun ba lei komunikasaun sosiál”, Sekretáriu Expedito esplika.
Tanba, tuir autoridade governativa ne’e katak lei komunikasaun ne’e uluk distintu deputadu sira halo iha tinan-2014, signifika tinan 11 ona ho avansa teknolojia hodi hola parte ba prosesu dezenvolvimentu konstrusaun Estadu.
Notísia relevante: https://tatoli.tl/2025/06/28/editor-no-jornalista-nia-esperansa-ba-alterasaun-lei-komunikasaun-sosial/
Enkuantu, Prezidente Konsellu Imprensa, Cesar Mali, haktuir katak iha semana kotuk sira marka prezensa ona iha enkontru, entaun tanba hakarak atinje objetivu ida-ne’ebé mak hanesan ba interese mídia nian hodi asegura papél jornalizmu la’o ho di’ak iha rai ida-ne’e.
“Diskusaun hanesan ne la’ós dala ida de’it, tanba lei ida-ne’e importante tebes ne’ebé ita labele halo urjentemente, entaun ohin ami foka ba pontu balun ne’ebe presiza halo tan ajustamentu atu enkontru tuirmai ami bele intende malu di’ak liután’’, nia dehan.
Tanba ne’e, tuir autoridade órgaun reguladora ne’e, mak ohin Sekretáriu Estadu Komunikasaun Sosiál, Expedito Loro Dias, propoin atu adia fali ba iha loron 14/08/2025 hodi ko’alia kona-ba substánsia revizaun lei komunikasaun sosiál nian.
Notísia relevante: https://tatoli.tl/2025/07/08/tlpu-upjtl-nia-esperansa-ba-alterasaun-lei-komunikasaun-sosial/
Jornalista: Alexandra da Costa
Editór: Rafael Ximenes de A. Belo
