KRO 2026: MTK husu proposta inisiál mantein miliaun $20
DILI, 08 Agostu 2025 (TATOLI)—Ministru Transporte Komunikasaun, Miguel Marques Gonçalves Manetelu, hateten prosesu ba elaborasaun Orsamentu Jerál Estadu (OJE) 2026 ne’e, MTK submete uluk proposta inisiál ho montante millaun $20, iha enkontru Komité Revizaun Orsamentu Polítika (KROP) tinan 2026.
Maibé, nia hatutan, Ministéria Finansas hasai envelope fiskál ne’ebé sira simu ba ho kategória rua de’it mak hanesan saláriu no beins servisu, neʼebé prevee millaun $9, entaun ida-ne’e la inklui ho kategória kapitál menór no kapitál dezenvolvimentu.
“Ohin, iha aprezentasaun pasta matak ne’ebé entrega mai ami ne’e mantein ho miliaun $9, ne’ebé mantein ho kategória tolu mak saláriu vensimentu, beins servisu no transferénsia públika ne’e atu entrega ba Administrasaun Navigasaun Aero Timor-Leste (ANA-TL),” Ministru Manetelu ne’e informa ba jornalista sira iha Ministériu Finansa, Aitarak-Laran, ohin.
Iha diskusaun ne’e, parte husi Ministériu Transporte Komunikasaun kontinua husu Ministériu Finansa mantein sira-nia proposta inisiál miliaun $20 ne’e, entaun hotu-hotu akomoda de’it tantu la hateten katak aseita adisionál ne’e ka lae.
Maibé, tuir nia, akomoda depois liuliu ba saláriu ho vensimentu tenke ko’alia ho Komisaun Funsaun Públika (CFP), tanba sira halo hela ezersisiu atu haree totál funsionáriu permanente hira, kontratadu hira no osan hira tanba ne’e desizaun sei mai ikus.
“Ohin, seidauk iha desizaun atu mantein evelope fiskál ida sira fó ba ami millaum $9 ou mantein ho ami-nia pedidu inisiál millaun $20,” nia hateten.
Entretantu, osan millaun $20 ne’e la tama orsamentu ne’ebé sei aloka iha Fundu Infraestutura (FI) tanba iha FI ne’e jere husi Ministériu Planeamentu Investimentu Estratéjiku (MPIE),
“Osan kontinuasaun ba Aeroportu Internasionál Prezidente Nicolau Lobato, estudu viabilidade ba ida agora atu la’o konstrusaun karik ne’e hotu iha 2026 no tuir mai sei halo konstrusaun portu Ataúro, portu Com (Lautein) no ida Kairabela ne’e tanbá JICA sei konstrui, entaun sira tau de’it kontra partida rihun $500 ne’ebé JICA husu,” nia dehan.
Hafoin ne’e avansa ho estudu viabilidade ba portu Manatutu, depois konetividade nasionál sira, data center (sentru dadus) ne’e sei tama hotu ba fundu infranstrutura, entaun millaun $20 koloka ba de’it saláriu vensimentu, bens servisu no transferénsia públiku, enkuantu millaun $1.8 sei transfere ba ANATL.
Iha kapitál menór uituan tanba karreta sira iha Ministériu (MTK) ne’e balun hola dezde 2012 ne’ebé karreta nia kondisaun ladi’ak. Se aprova proposta ne’e sei hola keareta, sira tuan haruka ba Patrimóniu Estadu no kapitál desenvolvimentu iha projetu kiik ne’ebé atu halo ne’e iha rihun $800 de’it.
“MTK nian saláriu vensimentu, bens servisu no transferénsia públiku millaun $9 deit. Se husu atu mantein ho millaun $20 ne’e, signifika karik atu dehan adisionál entaun ha’u (MTK) husu adisionál ne’e kuaze millaun $10, para atu fila-fali ba millaun $20,” nia esplika.
Jornalista : Alexandra da Costa
Editór : Cancio Ximenes
