AINARU, 11 Agostu 2025 (TATOLI)—Diretór eskola Ensinu Báziku Sentrál (EBC) 01 Maubisse Villa, Jorge Mendonça, husu Ministéria Edukasaun atu harii moru protesaun hodi garente nafatin kondisaun eskola no labele hetan estragus husi animál ka ema ruma.
Kondisaun eskola daudaun ne’e ladun seguru tanba laiha moru protesaun ida hodi salva netik animál ne’ebé komunidade husik livre iha arredór eskola nian.
“Kuazé tinan barak ona Governu la harii lutu ruma iha eskola ne’e, entaun animál no komunidade barak maa tama sai iha resintu eskola hodi estraga fasilidade eskola nian,” Diretór ne’e informa ba jornalista sira iha edifisiu eskola, ohin.
Nia informa, liuliu toilet iha eskola ne’e nia kondisaun ladun moos tanba la’ós de’it sira-nia estudante mak utiliza toilrt ne’e, maibé sira detekta katak komunidade balun ne’ebé hela besik iha eskola no estudante balun husi eskola seluk mós uza hotu.
“Ida-ne’e la’ós kauza husi bee mak laiha ne’e lae, tamba bee iha ne’e sai di’ak hela maibé tanba de’it laiha lutu entaun ema tama sai uza toilet ho livremente no aat liu halo foer toilet laran,” nia hateten.
Maske eskola destaka seguransa ida hodi halo kontrola ba eskola no sempre hato’o informasaun ba komunidade maibé laiha solusaun, tanba laiha ema ida atu servisu hamoos eskola (cleaning service) no laiha morru protesaun ne’ebé bele asegura.
“Entaun, kada sesta-feira, ami orienta estudante sira halo limpeza jerál hodi hamoos toilet, maibé liu tiha ne’e, komunidade kontinua halo foer fali. Tanba ne’e, ami husu ba parte relevante sira atu tau mós atensaun ba ami-ia preokupasaun sira, nune’e estudante bele uza toilet ho di’ak no seguru,” nia dehan.
Jornalista : Alexandra da Costa
Editór : Cancio Ximenesa
