Orsamentu insufisiente, SEII husu fundu adisionál ba atividade igualdade no inkluzaun
DILI, 13 Agostu 2025 (TATOLI)-Sekretaria Estadu Igualdade no Inkluzaun (SEII) husu adisionál millaun $1,2 iha reuniaun Komité Revizaun Orsamentu (KRO) ba 2026.
Sekretária Estadu Igualdade no Inkluzaun, Elvina de Sousa Carvalho, dehan tetu inisiál ne’ebé Ministériu Finansa haruka ba SEII hamutuk millaun $1,1, ne’ebé destina ba saláriu no vensimentu $618.646, bens no serbisu $537,184, enkuantu kapitál menór no transferénsia públika laiha.
“Husi orsamentu ne’e ami haree, halo kolokasaun ba ami-nia programa no planu prioridade sira la to’o. Entaun, ohin iha reuniaun ami husu adisionál hamutuk millaun $1,2”, Elvina de Sousa Carvalho hateten iha Ministériu Finansa.
Nia dehan iha tetu fiskál ne’e, Ministériu Finansa la prevee iha kapitál menór no transferénsia públika, tanba ne’e iha adisionál husu atu aloka hotu, nune’e kontinua atividade hanesan halo advokasia, hakbiit ekonomia feto, empoderamentu feto iha polítika.
Atividade prinsipál sira ne’ebé SEII foku iha 2026 mak prevensaun ba violénsia bazeia ba jéneru, haforsa institusionál no inkluzaun sosiál.
“Ami apresia tebes iha reuniaun Komité Revizaun Orsamentu ohin, tanba ho esplikasaun ne’ebé ami hato’o la’o ho di’ak. Fiar katak adisionál ne’ebé ami husu iha rezultadu, tanba tetu ne’ebé fó ba ami ne’e hetan redusaun 40% husi orsamentu tinan ne’e”, dehan
Kona-ba ezekusaun orsamentu SEII nian iha tinan ne’e atinje ona 51%, husi totál verba millaun $1,8.
Jornalista: Arminda Fonseca
Editora: Maria Auxiliadora
