BOBONARU, 13 Agostu 2025 (TATOLI)—Xefe Suku na’in-ualu hamutuk ho autoridade postu administrativu sira garante katak projetu reabilitasaun estrada husi diresaun Mau-Mali liga bá Postu Administrativu Kailaku, Munisípiu Bobonaru to’o área Bilimau, Postu Administrativu Hatulia, Munisípiu Ermera sei laiha tan impedimentu hosi indivíduu ka grupu ruma hanesan akontese iha tinan hirak liubá.
Xefe Suku Purugua, Januario Berre Bau haktuir foin lalais ne’e Administradór Postu Administrativu hamutuk ho líder komunitáriu suku ualu halo ona enkontru ho juventude, intelektuál no kombatente no veteranu sira iha Postu Administrativu Kailaku hodi tau-ideia hamutuk atu koopera ho kualker kompañia bainhira projetu ne’e implementa.
Notísia relevante: Komunidade Kailaku ezije Governu aselera prosesu reabilitasaun estrada Kailaku-Bilimau
Rezultadu husi enkontru ne’e, Januario haktuir, xefe suku na’in-ualu hamutuk ho Administradór Postu Administrativu Kailaku mós halo ona konkordánsia ho Ministru Obra Públika, Samuel Marçal atu asegura obra ne’e la’o ho susesu sein impedimentu.
“Ami xefe suku na’in-ualu hamutuk ho administradór postu inklui xefe aldeia sira iha ona konkordánsia katak sein impedimentu. Laiha razaun ida tan atu impede tan hanesan uluk tanba ami mai ho hanoin foun no vizaun foun katak tempu ona atu halo dezenvolvimentu,” nia informa ba jornalista sira iha salaun Maria Tapó, Bobonaru, Kuarta ne’e.
Maski prosesu sei iha hela Komisaun Nasionál Aprovizionamentu (CNA-sigla portugeza) atu halo konkursu, maibé Xefe Suku Januario fiar katak iha tempu badak Governu sei implementa projetu ne’e.
Aleinde ne’e, Xefe Suku Daudu, Antoninho Maria Soares reforsa bá-oin laiha dúvida atu mosu tan impedimentu tanba situasaun uluk la hanesan ho agora.
“Klaramente ami-nia hakarak mak atu hadi’a estrada Kailaku, ne’ebé ita hein de’it. Ami hamutuk ho juventude feto ho mane hakarak dezenvolvimentu la’o iha ami-nia Postu Administrativu Kailaku tanba durante ne’e ami preokupa kona-ba kondisaun estrada,” nia informa.
Antoninho Soares hato’o agradesimentu ba Governu tanba bele responde ona sira-nia aspirasaun.
Entretantu, reabilitasaun estrada nasionál iha seksaun entre kapitál Maliana ba Postu Administrativu Kailaku no Ponte Marobo ho naruk kilómetru 26 no kustu ne’ebé prevee hamutuk millaun $25,6.
Jornalista: Sergio da Cruz
Editór: Xisto Freitas da Piedade
