DILI, 14 Agostu 2025 (TATOLI)—Administrasaun Aeroportu no Navegasaun Aérea Timor-Leste, Empreza Públiku (ANATL, E.P) sei halo koordenasaun ho Ministériu Negósiu Estranjeiru no Kooperasaun hodi implementa regra rigorozu ba utilizasaun sala VIP iha aeroportu internasionál Nicolau Lobato, Komoro, Dili.
“Ami sei enkontru ho MNEK tau regra tuir nia dalan, tanba antes ne’e International Civil Aviation Organization (ICAO, sigla inglés) mai halo auditória deteta prosediementu balun ne’ebé ita presiza kumpre no implementa,” Prezidente Konsellu Administrasaun Aeroportu no Navegasaun Aérea Timor-Leste, Romaldo da Silva, informa ba jornalista sira iha nia kna’ar fatin, ohin.
ANATL sei halo sensibilizasaun uluk ba públiku hodi hatene, enkuantu ba sira-ne’ebé la kumpre normalmente sira sei fó sansaun ruma, signifika la’ós atu fó kulpa maibé oinsá minimiza movimentu iha sala VIP sein rekoñesementu ruma.
“Tanba, foin daudaun ICAO atu taka aeroportu ita-nian ne’e tanba kazu ida foin lais deportasaun Arnold Teves hodi hamosu dezintendimentu entre jornalista no seguransa aeroportu, aleinde momentu ne’e mós ICAO iha hela ne’e hodi halo prosesu auditoria,” nia hateten.
Tanba ne’e, Administrasaun Aeroportu no Navegasaun Aérea Timor-Leste, Empreza Públiku (ANATL, E.P) sei koordena hodi fó kompeténsia ba parte relevante ruma, atu prepara regra hodi garante seguransa iha sala VIP.
Jornalista : Alexandra da Costa
Editór : Cancio Ximenes
