SEPS apoiu foos saka 500 ba Autoridade Bobonaru

BOBONARU, 14 Agostu 2025 (TATOLI)—Sekretaria Estadu Protesaun Sivíl (SEPS), Kinta ne’e, apoiu foos kilógrama 25 hamutuk saka 500 ba Diresaun Servisu Munisipál Asaun Sosiál no Dezastre (SMASJ) Autoridade Munisipál Bobonaru.

Sekretáriu Estadu Protesaun Sivíl, Domingos Mariano Reis informa apoia ne’e atu tulun grupu vulneravel ne’ebé sai vítima ba dezastre naturál.

“Bainhira dezastre akontese sira mak risku. Akontese dezastre sira laiha ai-han, entaun bele afeta halo sira hamlaha no bele susar, entaun ohin ita entrega ba Autoridade Munisípiu Bobonaru hodi distribui ba grupu vulneravel sira-ne’ebé menus ai-han. Ida-ne’e beke hakbi’it sira loron ida-rua,” nia informa ba jornalista sira hafoin entrega foos iha edifísiu Autoridade Munisipál Bobonaru.

Notísia relevante: SEPS kontinua apoia nesesidade bázika ba vítima inséndiu iha Usitasa’e

Iha biban hanesan, Diretora Asaun Sosiál no Dezastre, Maria de Sousa Verdial Gama agradese ba Governu no iha tempu badak sei entrega ba grupu vulneravel hamutuk ema na’in-4000 mai husi postu administrativu neen iha Munisípiu Bobonaru.

“Semana ida rua nune’e ami sei halo enkontru ho administradór postu sira oinsá para ami trasa planu ida di’ak hodi distribui ai-han sira-ne’e,” nia konklui.

Enkuantu, apoiu ne’e la’ós entrega de’it iha Bobonaru maibé entrega mós ba munisípiu sira seluk ne’ebé akontese dezastre naturál.

Jornalista: Sergio da Cruz

Editór: Xisto Freitas da Piedade