Prezidente Repúblika manifesta solidariedade ba povu xinés
DILI, 15 Agostu 2025 (TATOLI) – Prezidente Repúblika, José Ramos-Horta, manifesta nia solidariedade ba Repúblika Populár Xina ne’ebé sofre inundasaun no rai-halai iha Provínsia Gansu no rejiaun sira seluk, ne’ebé rezulta ema lakon vida, kanek, no estragu materiál ne’ebé boot.
“Ha’u hakarak hato’o ba eselénsia [Prezidente Repúblika], Governu, no povu Xina, ha’u-nia sentidu kondolénsia profunda, nune’e mós Timor-Leste nia solidariedade durante tempu tristeza no adversidade ida-ne’e”, Ramos-Horta hateten liuhusi karta ne’ebé dirije ba Xefe Estadu Xina, Xi Jinping.
“Ami-nia hanoin no orasaun hamutuk ho família enlutada sira, sira ne’ebé lakon, no kanek sira, no ami dezeja ba sira forsa no rekuperasaun lalais. Ami mós louva esforsu inkansavel nian, ekipa salva vida sira no medida sira ne’ebé autoridade xineza sira foti hodi tulun komunidade ne’ebé afetada”, nia espresa, iha nota imprensa ne’ebé Tatoli asesu, ohin.
Xefe Estadu Timor-Leste ne’e dehan nasaun hamriik metin hamutuk ho povu Xina iha espíritu amizade no solidariedade nian, ho konfiansa katak reziliénsia no determinasaun nasaun Xina nian sei orienta rejiaun sira ne’ebé afetada ba rekuperasaun no rekonstrusaun.
TATOLI
