SEFOPE propoin adisionál millaun $5,5 ba kategória rua
DILI, 15 Agostu 2025 (TATOLI)—Sekretária Estadu Formasaun Profisionál no Empregu (SEFOPE, sigla portugés) propoin adisionál millaun $5,5 ba Komité Revizaun Orsamentu (KRO) 2026 ba kategória rua hanesan saláriu vensimentu no bens no servisu.
Sekretáriu Estadu Formasaun Profisionál no Empregu, Rogério de Araújo Mendonça, hateten, parte SEFOPE haree katak programa ba iha SEFOPE liuliu iha área formasaun empregu no traballu presiza tebe-tebes orsamentu, tanba ne’e sira propoin orsamentu adisional balun hodi reforsa programa prioridade sira.
“Hein katak proposta ne’ebe ami hato’o ba iha Komité Revizaun Orsamentu bele konvense fila fila hodi halo aprovasaun,” Sekretáriu Estadu ne’e informa ba jornalista sira iha Ministériu Finansa, Aitarak Laran, ohin.
Governante ne’e afirma, iha proposta adisionál sei indika mós ba programa prioridade hanesan sentru formasaun sira-ne’ebé SEFOPE estabelese ona iha munisípiu hotu-hotu, apoiu ba grupu auto-empregu temporáriu no apoiu mós ba iha estájiu profisionál sira, entaun programa hirak-ne’e hotu presiza orsamentu, nune’e SEFOPE tenke propoin ho proposta adisionál.
“Ita haree hanesan, ohin, ha’u hateten katak públiku sempre kestiona atu Governu kria empregu iha rai-laran. Maibé, tanbasá tenke kria fali empregu iha rai-li’ur, nune’e mak iha proposta adisionál ne’e refleta duni ba iha programa no atividade sira hodi kria empregu iha rai-laran liuhusi formasaun balun ne’ebé bele ajuda joven sira,” nia dehan.
Entretantu, nia mós hatutan, kona-ba ezekusaun Orsamentu Jerál Estadu (OJE) 2025 daudaun ne’e atinje 55% husi kategória sira hanesan kapitál dezenvolvimentu, transferénsia públiku, bens no servisu no saláriu vensimentu.
Jornalista : Alexandra da Costa
Editór : Cancio Ximenes
