F-FDTL no Autoridade Bobonaru realiza kompetisaun Korál-Poezia
BOBONARU, 18 Agostu 2025 (TATOLI)—FALINTIL-Forsa Defeza Timor-leste (F-FDTL) hamutuk ho Diresaun Servisu Munisipál Edukasaun Autoridade Munisipál Bobonaru, Segunda ne’e, realiza Kompetisaun Korál no Lee Poezia komemora ezisténsia Forças Armadas da Libertação Nacional de Timor-Leste (FALINTIL) ba dala-50 (20 Agostu 1975-20 Agostu 2025).
Kompetisaun Korál ne’e foka ba Marsa FALINTIL no múzika rezisténsia ne’ebé kompete husi estudante Ensinu Sekundáriu Jerál Públiku, Privada Katólika no Tékniku Vokasionál, enkuantu poezia ne’e ba estudante ensinu báziku sira.
“Importánsia ba atividade Koru ho Poezia ne’e atu tau-interese ba estudante sira nune’e sira mós bele hetan esperiénsia uitoan husi atividade ne’e nune’e sira bele implementa ba sira-nia vida no tempu ne’ebé sira estuda,” Diretór Servisu Munisipál Edukasaun Autoridade Munisipál Bobonaru, Miguel Freitas informa ba jornalista sira iha salaun Maria-Tapó, Bobonaru.
Notísia relevante: Bobonaru forma KO komemora tinan 50 loron FALINTIL
Aleinde ne’e, Sekretáriu Autoridade Munisipál Bobonaru ba Asuntu Administrasaun no Finansa, Domingos da Costa hato’o agradesimentu ba komandu F-FDTL tanba atividade ne’e importante ba foinsa’e sira.
Domingos husu ba partisipante sira atu partisipa ho di’ak no kontente tanba ne’e festa populár.
“Imi fila tenke lori rezultadu para inan ho aman kontente. Se la lori rezultadu mós oportunidade la’ós ohin loron de’it, maibé sei muda mai fali iha tempu seluk,” nia dehan.
Enkuantu, Komisaun Organizadora mós realiza atividade konsulta saúde ba komunidade, apoia umanitária, espozisaun fotografia no karavana.
Jornalista: Sergio da Cruz
Editór: Xisto Freitas da Piedade
