FDCH-ANATL loke bolsa estudu ba benefisiáriu na’in-30 iha área aviasaun
DILI, 18 Agostu 2025 (TATOLI)—Fundu Dezenvolvimentu Kapitál Umanu (FDCH) no Administrasaun Nasionál Áerea Timor-Leste (ANATL) loke bolsa estudu ba benefisiáriu na’in-30 hodi kontinua estudu iha área aviasaun nian.
Diretór Ezekutivu Fundu Dezenvolvimentu Kapitál Umanu, Júlio Aparício, hateten bolsa estudu ne’e ba tinan ida-ne’e, ne’ebé sira koloka orsamentu iha ANATL hodi haruka sira-nia benefisiáriu ba kontinua estudu iha Jakarta, Surabaya no Palembang.
“Ami aloka orsamentu bazeia ba benefisiáriu na’in-20 ninia, maibé orsamentu ne’e ANATL rasik mak jere entaun sira hakarak loke ba ema na’in-30,” Diretór ezekutivu ne’e esplika ba jornalista sira iha enkontru KRO 2026 iha Ministériu Finansa, Aitarak Laran, horiseik.
Tanba ne’e, nia dehan, prosesu la’o hela no FDCH sempre servisu hamutuk ho ANATL, bainhira hakat ba faze teste nian, hodi garante kualidade katak rekrutamentu ne’e tenke imparsiál laiha manipulasaun, nune’e bele hetan duni ita-nia ema-ne’ebé matenek para ba eskola iha área aviasaun ho di’ak.
Área bolsa estudu
Áre bolsa estudu sira mak hanesan, Tékniku Navigasaun Aero (TNU), iha Poltekbang Surabaya; Lalu Lintas Udara (LLU), iha Poltekbang Surabaya; Tékniku Eletrisidade Aeroportu (TLB), iha Poltekbang Surabaya; Teknik Bangunan Landasan (TBL), iha Poltekbang Surabaya; Airport Rescue Fire Fighting (ARFF), iha Poltekbang Palembang; Tékniku Mekánika Aeroportu (TMB), iha PPI Curug- Jakarta; OBU, iha PPI Curug – Jakarta.
“Ami mós servisu hamutuk ho Sekretária Estadu Arte no Kultura (SEAK) ne’ebé daudaun ne’e iha hela prosesu para haruka benefisiáriu sira ba kontinua hala’o iha Jogja-Indonézia hodi eskola kona-ba arte no kultura,” nia dehan.
Nune’e, tuir nia, ohin sira halo verifikasaun dokumentu finál ona ba benefisiáriu sira konsege identifika ema na’in-ualu 08) ne’ebé kompostu husi mestradu na’in-haat (4) no lisensiatura na’in-haat (4).
Entretantu, diretór ne’e mós informa total benifisiáriu ne’ebé FDCH rejista no agora daudaun simu hela bolsa estudu kompostu husi rai-laran no rai-li’ur hamutuk 12.337.
Benefisiáriu hirak ne’e, nia informa, ida-ne’ebé ativu hela iha eskola ne’e hamutuk 4.480, enkuantu ida-ne’ebé gradua tiha ona ne’e hamutuk 6.275. Balun husi tinan 2011 to’o 2025, ne’ebé iha benefisiáriu 1000-resin mak abandona sira-nia eskola.
“Maibe ne’e la’ós tempu ha’u-nia mandate,” nia hateten.
FDCH kria programa Buka Tuir Benefisiáriu (BTB), ne’ebé iha sira identifika benefisiáriu ne’ebé gradua no konsege hetan ona servisu hamutuk 4.373 no benefisiáriu sira-ne’e barak liu mak servisu iha instituisaun Governu liuliu Ministéria Saúde.
“Ami halo tuir termu ne’e iha tinan 2021 ne’e maka hodi hetan, no tinan ida-ne’e ami iha planu atu kontinua termu BTB para ita hatene benefisiáriu FDCH ne’e servisu iha instituisaun ne’ebé,” nia hateten.
Entretantu, alvu bolsa estuda ne’ebé FDCH sei oferese ba tinan oin hamutuk 400-resin no sei fahe ba liña ministeriál sira mak sei koloka kontinuasaun benefisiáriu ba kada área prioridade sira.
Jornalista : Alexandra da Costa
Editór : Cancio Ximenes
