APFTL realiza kongresu hodi hili estrutura foun
DILI, 23 Agostu 2025 (TATOLI) – Alumni Parlamentu Foinsa’e Timor-Leste (APFTL) realiza kongresu ba datoluk hodi diskute pontu importante tolu hanesan, revizaun ba estatutu, define vizaun ho divizaun foun no hili estrutura foun.
Prezidente Alumni Parlamentu Foinsa’e Timor-Leste, Zaulino Gomes da silva, hatete iha kongresu referidu buat ne’ebé importante liu mak, haree fila-fali estatutu organizasaun nian, atu adapta tuir situasaun reál timór nian no mós hili hili lideransa foun.
“Ami nia pontu importante ida mak define klaru vizaun no diresaun foun, hili estrutura foun atu kontinua lidera no hare fila-fali lakuna sira iha estatutu ne’ebé impede servisu durante tinan lima liu, nune’e iha kongresu ne’e atu ajusta fali tuir realidade,” Zaulino, ba Jornalista sira iha salaun UCT Balide, sábadu ne’e.
Alende ne’e, husi kongresu referidu la’ós de’it espasu atu troka ideia no define diresaun foun sira, maibé momentu ida atu reflete ba susesu no dezafiu sira ne’ebé hakat liu ona.
“Maibe dezafiu hirak ne’e fó mai ita misaun, oinsá ita atu krese no oinsa ita atu forte liu tan hodi hasoru dezafiu ne’ebé sei boot liután ida ne’e, ne’ebé sei mai atu servi ita-nia rain liu husi espasu ida alumni parlamentu foinsa’e Timor-Leste,” nia akresenta.
Tuir nia dezafiu referidu prova APFTL nia existensia no marka diferensia, ida-ne’e hatudu APFL iha duni determinasaun atu servi nasaun tuir prinsipiu, valór no vizaun ne’ebé hatur ona.
“Aproveita momentu ida ne’e ha’u hakarak lori ita ba refleta tema ne’ebé iha ne’e katak, ‘enfrenta dezafiu no harii futuru’, tanba ne’e ita nia moris hakarak ka lakoi dezafiu iha, iha para halo ita krese no maduru liu tan, atu bele hakat ho kuidadu no ho objetivu, ida ne’e mak importante ba ita oinsa inova ita nia estratejia sira atu bele hakat liu dezafiu sira ne’e,”prezidente dehan.
Zaulino aprofunda futuru ne’e labele hein, maibe presiza hari, tanba ne’e atu hari futuru ida tenke brani hasoru desafiu ho korajen ida ne’ebé forte.
“Ida ne’e hanesan momentu ida importante oinsá halo tranzisaun ba ita nia liderasa foun ne’ebé sei mai ho vizaun foun, atu lori APFTL ba futuru ida di’ak liu, no atu halo transformasaun presiza lider ida ne’ebé mai ho vizaun klaru no inspira membru ida-idak atu hola parte iha organizasaun,”nia hatete.
Tanba ne’e membru hotu nia kontribuisaun importante atu servi timor ida laos ohin de’it,maibe kontinua servisu ba timor ida ne’ebé sei mai, no timor ida ne’ebé sei mai APFTL hakarak timor ida ne’ebé inkluzivu, suatenavel no justu ba timoroan hotu.
Aleinde ne’e kongresu refere sei halo durante loron rua hahu husi loron sabadu 23 no sei remata iha domingo 24 ne’e.
Enterantu alumni parlamentu foinsa’e Timor-Leste daudaun ne’e iha membru 500-resin ne’ebé eziste iha tinan 2015 liubá.
Portantu durante ne’e APFTL konsege fó formasaun edukasaun sívika ba joven sira, kuda ai-oan 1000-resin no mós konsege halo mapamentu ba grupu joventude sira ne’ebé eziste iha Timor-Leste.
Jornalista : Osória Marques
Editór: Florencio Miranda Ximenes
