MF husu adisionál millaun $3,8 iha KRO

DILI, 23 Agostu 2025 (TATOLI) – Diretór Jerál Servisu Korporativu iha Ministériu Finansa (MF), Epifanio Carvalho informa MF husu adisionál ba kapitál dezenvolvimentu no kapitál menór, ne’ebé ho montante milaun $3.8.

“Ministériu Finansa husu adisionál ba de’it Kapitál menór no kapitál dezenvolvimentu mak ho montante miliaun $3.8. Ida-ne’e ita atu halo konstrusaun ba morru patrimóniu Estadu nia fatin iha Tasi-Tolu, hodi sasán sokata ne’ebé atu halo leilaun. No mós sosa bee ba porifikasaun ba Autoridade Tributáriu no autoridade adueneria inklui ba patrimóniu Estadu”, Diretór Jerál dehan ba jornalista sira, iha Ministériu Finansa, ohin.

Diretór Jerál hatutan Ministériu Finansa nia alokasaun orsamentu 2026 nian liliu tetu fiskál ida-ne’e ministériu finansa hetan $14.707.977.

“Ministériu Finansa hetan apoiu orsamentu direta milaun ida ($1.000.000). Entaun tau hamutuk miliaun $15.7”, nia dehan.

Dirijente ne’e dehan osan ne’e ba programa rua mak atu implementa jestaun finansa públika no mós fortalesimentu institusionál.

“Ohin iha KRO ne’e, haree no rona hodi sosa mós ekipamentu hanesan jeradór, ne’e ba Autoridade adueneria no patrimóniu Estadu no ita-nia proposta ne’e ba pontu entrada sira-ne’e hotu, agora ita tau ona ba planu ministériu finansa nian. Iha saláriu no vensimentu ita la’ós adisiona lae, ida-ne’e atu kompleta de’it ba ezistente. Ita laiha adisionál ba saláriu no vensimentu, inklui ba rekrutamentu ba ema 160, ne’ebé mak sei koloka ba Autoridade Tributáriu no autoridade adueneria”, nia dehan.

Entretantu Orsamentu Jerál Estadu 2025, Ministériu Finansa iha $18.889.241. Kompostu saláriu no vensimentu hamutuk $9.659.322, bens no Servisu iha $8.347.225, kapitál menór hamutuk rihun $45 no kapitál dezenvolvimentu $837.694.

Jornalista ; Osória Marques

Editór: Florencio Miranda Ximenes