DILI, 27 Agostu 2025 (TATOLI)—Governu liuhusi reuniaun Konsellu Ministru, kuarta ne’e, delibera hodi indika Ministru Transporte no Komunikasaun, Miguel Marques Gonçalves Manetelu, hodi reprezenta Governu Timor-Leste partisipa iha Kongresu Uniaun Postál Universál (UPU) ba da-28 iha Emiradu Arabe Unidu Dubai, hahú husi 08-19 Setembru 2025.
Objetivu husi atividade ne’e atu define matadalan estratéjiku prinsipál sira ba setór ne’e iha siklu 2026-2029, no iha kongresu ne’e sei halibur nasaun membru Uniaun Postál Universál (UPU) hamutuk 192.
Bazeia ba komunikadu ne’ebe Agência Tatoli asesu ne’e haktuir, iha ne’eba prienxe mós atividade seluk aleinde kongresu sei iha iha reuniaun plenária hodi hili membru husi konsellu administrasaun organizasaun nian.
Durante enkontru, nasaun membru sira sei hili mós dirijente foun sira UPU nian, inklui Diretór-Jerál no Vise-Diretór-Jerál, no mós membru 41 husi Konsellu Administrasaun (kadeira ida rezerva ba nasaun uma-na’in no 40 fahe hanesan entre rejiaun jeográfika neʼebé diferensa).
Enkuantu, iha atividade eleisaun ba Konsellu Administrasaun sei hala’o iha plenáriu iha loron 18 fulan-Setembru tinan 2025, no pelumenus metade husi membru sira tenke hetan renovasaun, tuir regulamentu organizasaun nian.
Jornalista : Alexandra da Costa
Editór : Cancio Ximenes
