AACTL preokupa “rubber” iha pista aeroportu Komoro bele kria asidente ba aviaun

DILI, 02 Setembru 2025 (TATOLI)-Autoridade Aviação Civil Timor-Leste (AACTL) preokupa ho kondisaun rubber (borracha, portugés) ne’ebé belit metin iha pista bele fó impaktu no kria asidente ba aviaun bainhira landing (tun).

“Se ekipa tékniku Administrasaun Aeroportu no Navegasaun Aérea Timor-Leste, Empreza Públiku (ANATL, E.P) sira la hamoos nafatin rabel ne’e loron ruma sei fó impaktu ba ema-nia seguransa, satan iha tempu udan ne’e namdoras”, Prezidente Autoridade Aviasaun Sivíl Timor-Leste, Zezinho António Gusmão, hateten ba Agência Tatoli iha nia kna’ar fatin, MTK, Kaikoli, ohin.

Tamba ne’e, nia husu ba parte kompetente sira tenke tau ona atensaun ba kestaun ida-ne’e tanba aeroportu ne’e ne’e hanesan odamatan boot ida ne’ebé pasajeiru barak mak halo viajen ba-mai ka tama-sai, liuliu Governante sira-ne’ebé sempre halo viajen ofisiál.

“Ho nune’e, ita presiza kria kondisaun di’ak ba fatin ne’e, tanba kestaun ne’e pilotu barak ona mak hato’o sira-nia preokupasaun mai ami kona-ba kondisaun rubber (borracha) iha pista ne’e. Ha’u lahatene ANATL sira hamoos ona ka lae, tanba ami mós fó ona karta pedidu ida ba sira,” nia hateten.

Iha semana otuk, nia dehan, sira konvoka mós enkontru ho Ministru Transporte Komunikasaun (MTK), Miguel Marques Gonçalves Manetelu inklui ANATL rasik no Ministru mós fó ona orientasaun ba sira hodi rezolve problema ne’e.

“Tanba ida-ne’e la’ós ami-nia servisu maibé ANATL nia kompeténsia tanba sira mak halo operadór no jestaun manutensaun ba aeroportu, enkuantu ami-nia servisu atu halo ratifikasaun, aprovasaun no fiskalizasaun,” nia dehan.

Iha biban ne’e, Ministru Transporte Komunikasaun (MTL), Miguel Marques Gonçalves Manetelu, hateten nia orienta ona servisu ba ANATL no AACTL hodi rezolve problema refere.

“Lahatene, sira halo ona ka seidauk, ne’e imi ba husu iha sira tanba ha’u orienta ona sira,” bua hateten..

Jornalista : Alexandra da Costa

Editór        : Cancio Ximenes