AINARU, 04 Setembru 2025 (TATOLI)—Governu liuhusi Ministériu Obra Públika sei planeia atu dezenvolve munisípiu Ainaru sai ezemplár turístiku iha Timor-Leste ka territóriu nasionál, tanba munisípiu ne’ e iha rekursu potensiál barak ne’ebé dada ema atu halo investimentu.
Miniatru Obra Públika, Samuel Marçal, hateten Governu presiza dezenvolve Ainaru tanba munisípiu ne’e iha ninia rekursu poténsia barak tebes, nune’e ema barak mak hakarak halo investimentu hanesan restaurante, otél no bainhira sira konstrui ona nune’e sira mós sei sosa komunidade nia produtu lokál hanesan fehuk ropa, repollu, senoura, modo tahan no seluk tan.
“Tinan ida-ne’e mós Governu sei asina kontratu ho empreza hodi reabilita estrada urbana Ainaru laran. Ita atu dezenvolve Ainaru sai hanesan fatin ezemplár ba fatin turístiku sira seluk tanba Ainaru ninia beleza kapaas tebe-tebes foho haleu, iha bee tudak (air terjung), Rabilau, Ramelau,” Ministru ne’e informa ba jornalista sira iha Rileku, Maubisse, ohin.
Tan, nia dehan, Ainaru nia fatin turístiku lahanesan ho fatin sira seluk, maske Same besik hela imi mós ami-nia fatin sira hanesan ne’e laiha, tanba ne’e nia mós ko’alia ona ho Primeiru Ministru atu muda uitoan modelu konstrusaun estrada urbana iha Ainaru, nune’e ema mai haree sidade Ainaru furak tebes.
“Ida-ne’e rekursu poténsia di’ak ida bainhira ita hadi’a kondisaun infraestrutura di’ak sei dada no atrai ema hodi ba vizita no halo investimentu ruma iha ne’e. Duké gasta osan ba Bali-Indonézia, di’ak liu investe rasik ita-nia rain,” nia hateten.
Aleinde ne’e, nia dehan, Ainaru la’ós konesidu liu ho fatin turizmu maibé riku mós ho produtu agrikola hanesan repollu, fehuk europa, entaun Ainaru sai hanesan fatin ida kapa’as tebe-tebes no sei atrai ema barak mai vizita iha fatin ida-ne’e.
“Nune’e, investimentu ne’ebé komunidade sira hetan bele uza ba sustentabilidade ekonómia família, entaun iha hotu-hotu nia mehi ba ukun-an ne’e mak hakarak ida-ne’e. Ita la hamlaha tan tanba ita-nia rai ne’e bokur no la dependénsia de’it ba mina-rai,” nia dehan.
Tanba ne’e, nia apela ba Ainaru-oan sira se imi mak badinas entaun imi sei moris di’ak-liu fali, tanba ema-ne’ebé hamlaha signifika nia baruk-teen atu halo jestaun ba rai nia bokur.
Prezidente autoridade munisípiu Ainaru, Manuela Georgina Carmo, hateten Governu tenke dezenvolve duni tanba Ainaru iha ninia rekursu potensiál liuliu turístiku no agrikultura nian.
“Hanesan ita boot sira haree produtu ne’ebé ita iha sempre investe ba merkadu iha kapitál, ne’e tanba ita-nia rai malirin nune’e halo rai bokur hodi rezulta produtu lokál barak no fresku,” nia hateten.
Aleinde ne’e, nia hateten, rai ne’e poténsia agrikultura maibé sira mós iha rekursu potensiál hanesan sítiu turístiku hanesan Ramelau ne’e kuaze ema ba vizita kada loron hanesan mós iha Rabilau.
Jornalista : Alexandra da Costa
Editór : Cancio Ximenes
