DILI, 16 Setembru 2025 (TATOLI) – Diretór Servisu Saúde Munisípiu Ermera, António de Fátima, husu ba Governu liuhusi Ministériu Saúde, atu halo uma ba pesoál saúde sira ne’ebé hela dook husi sentru saúde no mós aumenta pesoál saúde tanba la sufisiente.
Nia dehan, presiza halo uma ba pesoál saúde nune’e sira hela besik sentru saúde hodi halo atendementu ba pasiente. Nune’e mós aumenta pesoal saúde tanba dadaun ne’e pesoál saúde iha sentru saúde ne’e destaka ema maiória tolu de’it.
“Ita halo ona sentru saúde no postu saúde maibé ita seidauk halo uma ba pesoál saúde sira, tanba ida-ne’e mak pesoál saúde sira hela dook entaun ita-nia atendementu ladún masimu tanba hela dook mai tarde, entaun ida-ne’e mak problema. Nune’e mós rekursu umanu seidauk sufisiente. Tanba kada postu saúde ita tau ema nain-ida, barak liu ita tau ema na’in-tolu no balun rua, ita seidauk bele prenxe kondisaun mínima sira-ne’e,” António de Fatima, iha Delta Nova, Tersa ne’e.
Autoridade saúde Ermera ne’e hatutan, pedidu ba Governu atu halo uma ba pesoál saúde ne’e halo hotu ona maibé to’o agora seidauk iha resposta. Maibé, nafatin prioridade atu halo uma ba pesoál saúde hodi hela ba mak Ermera Letefoho, Atsabe no mós sira seluktan.
“Ita tau prioridade, liu-liu ba sentru saúde ne’ebé nia kondisaun la favoravel ona, ida-ne’e mak ita tau atensaun. Ida-ne’ebé ita identifika atu halo ne’e mak Letefoho, Atsabe, no mós sira seluktan. Sira-ne’e tenke halo uma ba pesoál saúde, tanba pesoál saúde sira hela dook, hela iha vila mak ba servisu ne’e problema,” nia dehan.
Nia hatutan, atu prenxe kondisaun mínima hodi hakat ba desentralizasaun podér lokál rekursu umanu sei menus. Ida-ne’e presiza Governu tau atensaun.
“Maibé agora realidade kada postu saúde ita tau ema nain-ida (1), barak liu ita tau ema na’in tolu (3) no balun iha rua (2). Ita seidauk bele prenxe kondisaun mínima sira-ne’e. Hein katak ita-nia planu 2027 desentralizasaun podér lokál ba iha kámara munisipál ne’e kuandu ita estabelese ona ita bele prenxe kondisaun mínimu sira-ne’e, maibé agora ita sei dook uituan,” nia dehan.
Enkuantu, pesoál saúde iha Ermera hamutuk, 479, doutór iha 43. Totál sentru saúde iha Ermera hitu (7), postu saúde 39, postu tratamentu iha rua (2).
Iha Programa Governu Konstitusionál da-sia iha nú. 2.2.4. Infraestrutura iha Setór de Saúde, entre kompromisu sira seluk iha pontu da-neen (6) garante katak profisionál Saúde ne’ebé hala’o servisu dook husi sira-nia área rezidénsia, liuliu iha área remota sira, sei iha alojamentu ne’ebé di’ak.
Jornalista : Osória Marques
Editór: Rafael Ximenes de A. Belo
