MF aprezenta enkuadramentu OJE no jestaun finaseira ba KM
DILI, 18 Setembru 2025 (TATOLI)—Governu liuhusi Ministériu Finansa (MF), kinta ne’e, iha reuniaun Konsellu Ministru aprezenta projetu Dekretu-Lei nú. 3/2025, 23 Abríl, neʼebé ho objetivu atu regula enkuadramentu Orsamentu Jerál Estadu (OJE) no jestaun finanseira públika.
Ministra Finansa, Santina José Rodrigues Cardoso, hatutan objetivu husi aprezentasaun ne’e oinsá atu halo preparativu ba planeamentu no ezekusaun sira Governu nian.
“Ohin ne’e aprezenta de’it, foti husi lei sira-neʼebé mak ezistente nomós halo melloramentu regulamentasaun,” Ministra Finansa ne’e hateten ba jornalista sira hafoin ramata reuniaun KM iha Palásiu Governu, Dili.
Nia esplika, lei ne’e ninia intensaun oinsá atu regula preparasaun orsamentu liuhusi ezekusaun no-mós relatóriu OJE kada tinan-tinan nian.
“Ha’u hanoin kona-ba prosesu orsamentu hanesan ita-boot sira hatene daudaun ne’e, iha hela prosesu elaborasaun no sei iha mós faze ida-neʼebé sei hakerek livru sira ba lei ne’e rasik,” nia esplika.
Tuir dokumentu ne’ebé Tatoli asesu husi Portál Governu haktuir, objetivu husi diploma ida-ne’e atu asegura implementasaun hotu ba lei Enkuadramentu Orsamentál no jestaun finanseira públika nian, hametin kompromisu Governu Konstitusionál IX ho jestaun finanseira ida-ne’ebé sólida, transparente no orientada ba rezultadu bazeia ba dixiplina, responsabilizasaun no utilizasaun efisiente ba rekursu públiku.
Jornalista : Alexandra da Costa
Editór : Cancio Ximenes
