Autoridade Kovalima rejista benefisiáriu pensaun sosiál na’in-7,257
KOVALIMA, 24 Setembru 2025 (TATOLI)- Koordenadór Deskonsentradu Munisípiu Kovalima ,Bernardino Sequeira, relata katak prosesu pagamentu faze datoluk ho benefisiáriu idozu no invalidez hamutuk 7,257 mak sei simu pensaun sosiál.
“Bazeia ba dadus pensaun sosiál ba idozu no invalidéz ba pagamentu faze datoluk na’in-7,257 maka elezivél atu simu sira nia direitu ba pensaun sosiál husi Ministériu Solidariedade Sosiál no Inkluzaun (MSSI)”, Bernardino Sequeira, informa dadus ne’e ba TATOLI, iha Suai Loro.
Benefisiáriu 7,257 ne’e kompostu husi idozu hamutuk 6,874 no invalidez 383 maihusi postu administrativu sira hanesan Fatululik, Fatumea, Fohorem, Tilomar, Maucatar, Suai no Zumalai.
Koordenadór ne’e esplika hodi halo komparasaun dadus pagamentu pensaun sosiál faze daruak benefisiáriu hamutuk 7,362, maibé pagamentu iha faze ba datoluk redús benefisiáriu idozu na’in-105, nune’e pagamentu ba faze datoluk benefisiáriu hamutuk 7,257.
Razaun dadus benefisiáriu ba idozu sira redús na’in-105 tanba idozu sira mate ona no lideransa komunitária-sira liuhusi nia família halo prosesu direitu pensaun sosiál ba idozu.
Aleinde ne’e, Dadus pensaun sosiál (PS) ba invalidez pagamentu faze datoluk iha mudansa, tanba benefisiáriu na’in-383, maibé prosesu pagamentu pensaun sosiál ba daruak ne’e na’in-344
Ho nune’e, Dadus atuál pagamentu pensaun sosiál ba faze datoluk na’in- 7,257 mai husi postu administrativu hitu mak hanesan postu administrativu Fatululik benefisiáriu na’in-251,Fatumea 501,Fohorem 570,Maucatar 1.076 ,Suai 2.180,Tilomar 835 no Zumalai 1.837.
Tuir oráriu ne’ebé maka fó sai husi Banku Nasionál Komérsiu Timor-Leste (BNCTL), pagamentu pensaun sosiál faze datoluk ba benefisiáriu idozu no invaliz iha Munisípiu Kovalima hahú iha loron 9 Outobru no finaliza iha loron 13 Outobru.
Jornalsta: Celestina Teles
Editór:Florencio Miranda Ximenes
