PAM Ainaru planeia konstrui merkadu foun Maubisse iha tinan oin
AINARU, 27 Setembru 2025 (TATOLI)–Prezidente Autoridade Munisípiu (PAM) Ainaru, Manuela Carmo Bucar Corte-Real informa tinan oin (2026) sei halo konstrusaun foun ba merkadu Maubisse hodi fasilita vendedór sira halo negósiu.
“Proposta atu halo konstrusaun ba merkadu ne’e hetan ona aprovasaun iha reuniaun Komité Revizaun Orsamentu (KRO) 2026, ne’ebé tinan oin ita sei halo konstrusaun foun,” Manuela Carmo Bucar Corte-Real ba TATOLI iha Ainaru, Sábadu ne’e.
Tuir nia, importante tebes tenke halo konstrusaun foun tanba merkadu Maubisse rasik nu’udár fatin sentru ba movimentu públiku maibé nia kondisaun no fasilidade ladún di’ak atu fasilita vendedór sira hala’o negósiu.
“Ita hotu hatene kuandu tempu bazár merkadu ne’e sai tráfiku ba movimentu transporte públiku,” Manuela dehan.
Kona-ba orsamentu konstrusaun merkadu, nia esplika, prevee rihun $200-resin. Husi orsamentu ne’e sei harii baraka nune’e mobiliza vendedór sira ba fa’an iha laran, inklui fatin estasioanamentu.
“Merkadu ne’e ita konstrui bazeia ba levantamentu dadus tuir ita-nia vendedór sira-ne’ebé fa’an permanente iha merkadu hamutuk 100 inklui husik mós espasu ba vendedór sira-ne’ebé fa’an temporáriu,” Manuela informa.
Iha fatin hanesan, Vise-Ministru Administrasaun Estatál, Jacinto Rigoberto hateten Governu liuhusi Prezidente Autoridade Munisipiu Ainaru define ona iha planu orsamentu, tan ne’e tinan oin komesa hadi’a merkadu referidu no husu hotu-hotu nia kooperasaun hodi asegura konstrusaun ne’e.
“Maubisse koñesidu ho koto, repollu, fehuk ropa, ervilla. Ne’e mak Maubisse nia produtu ne’ebé maka’as tebes no Maubisse nia kafé mós ho kualidade aas tebes. Sira-ne’e hotu presiza fatin merkadoria ne’ebé di’ak tebes. Tanba ne’e mak Governu tau ona orsamentu atu implementa iha tinan oin no husu hotu-hotu atu koopera hodi merkadu ne’e bele di’ak no dignu,” Rigoberto tenik.
Iha fatin hanesan, vendedór Vicente da Costa sente kontente ba planu halo konstrusaun foun ba merkadu Maubisse tanba merkadu ne’e rasik tempu bazár difikulta tebes movimentu transporte públiku.
“Tempu bazár ita halo movimentu la’o ain de’it mós kuidadu tanba fatin kloot, ema barak no movimentu transporte públiku mós barak tanba iha loos estrada ibun,” nia haktuir.
Jornalista: Arminda Fonseca
Editór: Xisto Freitas da Piedade
