BOBONARU, 29 Setembru 2025 (TATOLI)-Autoridade Postu Administrativu Bobonaru, munisípiu Bobonaru, organiza jogu komunitáriu hodi komemora Loron Konsulta Populár 30 Agostu tinan 2025.
Desportu komunitáriu ne’e ho modalidade haat mak hansaan futeból ba labarik ki’ik, maratona ba grupu feto ho mane, dada-tali no hana-kalik.
Administradór Postu Administrativu Bobonaru, Tomás Henriques Barreto, dehan tuir loloos eventu ne’e realiza iha ámbitu komemorasaun loron istóriku ne’e, maibé la konsege tanba postu Bobonaru simu hela vizita illas Krús Joven nasionál no internasionál.
“Ita adia tiha, agora mak foin komemora. Eventu ida-ne’e ita realiza atu haree talentu joven sira nian iha parte desportu hanesan maratona, bola-ain no seluk tan. Iha ne’e bola-liman mak laiha”, nia dehan ba Tatoli, ohin.
Prezidente Komisaun Organizadora, Jacinto Godinho Pereira, reforsa katak atividade ne’e importante tebes no bele fihir joven sira ne’ebé iha talentu.
“Ami-nia observasaun, programa ne’e di’ak. Ami hakarak tinan-tinan tenke iha kontinuasaun para hafanun ita-nia joven sira ne’ebé tuur halerik de’it. Se bele loke hanesan Indonezía nia PORDA ka Pekan Olaraga Daerah tenke halo, se la’e ita-nia joven barak mak iha talent, maibe sira atu kompete susar, tanba laiha eventu hanesan ne’e”, nia sujere.
Eventu ne’e realiza ho apoia orsamentu husi Ministeriu Juventude, Desportu, Arte no Kultura (MJDAK) hamutuk rihun $3.
Jogu ho modalidade futeból hahú ona iha loron 15 no finaliza iha 29 Setembru. Ekipa FC Lusinda husi EBC Gumer no Meza-Foho husi suku Lour mak ohin kompete malu iha tuku 17h00.
Notísia relevante: Grupu Juventude loke jogu komunitáriu hodi selebra loron “Balibo Five” ba da-50
Jornalista: Sergio da Cruz
Editora: Maria Auxiliadora
