DILI, 30 Setembru 2025 (TATOLI)—Governu liuhosi Ministériu Juventude, Desportu, Arte no Kultura (MJDAK) hamutuk ho Federasaun Futeból Timor-Leste (FFTL) selebra akordu utilizasaun kampu futeból Estádiu Munisipál Dili.
Akordu entre MJDAK ho FFTL hala’o liuhosi asina ona Memorandu Entendimentu (MdE) kona-ba transferénsia direitu uzu Estádiu Munisípal Dili, ne’ebé hala’o iha edifísiu FFTL, Bairro dos Grilos, Dili, Tersa ne’e.
Prezidente FFTL, Nilton Gusmão hato’o agradesimentu ba MJDAK ne’ebé iha disponibilidade hodi atribui utilizasaun kampu nasionál referidu no ho kolaborasaun husi parte rua sei fó impaktu pozitivu hodi hasa’e kualidade kompetisaun sira, dezenvolvimentu atleta no organizasaun eventu desportivu nasionál no internasionál iha Timor-Leste.
“Memorandu entendimentu ne’e reprezenta pasu estratéjiku ida iha dezenvolvimentu sustentavel futeból nasionál liuhosi utilizasaun ótimu no profisionál ba infraestrutura desportiva,” Prezidente FFTL, Nilton Gusmão hateten liuhosi nota imprensa ne’ebé TATOLI asesu, Tersa ne’e.
Kontiudu husi nota memorandu ne’e, define MJDAK nu’udár entidade relevante, aseita fó ba FFTL kona-ba uzu Estádiu Dili nian ho taxa ba períodu tinan rua-nulu-resin-lima (25) ba objetivu sira rekonstrusaun, manutensaun no utilizasaun hala’o atividade futeból públiku, privadu, nasionál no internasionál.
Aleinde ne’e, parte rua, MJDAK ho FFTL mós sei estabelese Konsellu Administrasaun ida ba Estádiu Dili, ho membru na’in-lima kompostu hosi FFTL ema-na’in tolu no MJDAK ema-na’in rua no FFTL mak sei responsavel administrativu ba kontrolu, utilizasaun no manutensaun loloos ba kampu futeból no área sira-ne’ebé hale’u estádiu Dili inklui pista atletizmu nian.
Jornalista: Natalino Belo
Editór: Xisto Freitas da Piedade
