Autoridade Bobonaru sei hadi’a jestaun institusionál
BOBONARU, 10 Outubru 2025 (TATOLI) – Prepara ba Poder Lokál, Autoridade Munisípiu Bobonaru planeia, ba oin, sei hadi’ak jestaun instituisionál liuhusi halo melloria ba sistema jestaun informasaun hotu ne’ebé iha no halo interligasaun hodi hasa’e efisiénsia.
Alende ne’e, sei promove utilizasaun teknolojia hodi hadi’a di’ak liután servisu administrasaun nia liuhusi estabelese plataforma online ida atu asegura katak servisu munisipál sira hotu bele fahe no rai dokumentu sira eletróniku no partilla online.
“Nune’e ita la presiza tan hasai osan hodi sosa makina impresaun, sosa surat-tahan no armáriu sira ita presiza atu rai dokumentu hirak ne’e, ho utilizasaun Plataforma online, ita bele maksimiza rekursu, espasu servisu no bele kria ambiente ida amigavel ba iha ita-nia ambiente servisu rasik,” PAM Bobonaru, Paulo Moniz Maia hateten iha salaun Maria-Tapo, ohin.
Planu preparatóriu ne’e, Paulo Moniz Maia,subliña atu responde ba avaliasaun kondisaun mínimu ne’ebé governu liuhusi Ministériu Administrasaun Estatál (MAE) sei realiza.
“Nu’udar Bobonaru-oan ha’u husu atu ita bele servisu hamutuk hodi konsolida kapasidade instituisionál, utiliza ita-nia rekursu ne’ebé naton hodi lori servisu besik ba povu,ho lais, transparente no iha akuntablidade”, nia hakotu.
Atu promove efisiénsia husi prestasaun servisu iha autoridade munisipál, Antigu deputadu ne’e afirma, governu promove ona Balkaun Uniku hodi sentraliza servisu sira hotu iha fatin ida de’it,nune’e povu bele asesu servisu ho lais no efisiente liután.
Notisía relevante: https://tatoli.tl/2025/02/03/cci-tl-bobonaro-preparadu-simu-poder-lokal-desentralizasaun-administrativa/
Jornalista: Sergio da Cruz
Editór: Rafael Ximenes de A. Belo
