BEIJING, 14 Outubru 2025 (TATOLI) –Prezidente Repúblika Popular Xina, Xi Jinping, hato’o katak konsensu konjuntu husi komunidade internasionál mak xave importante hodi promove no aselera dezenvolvimentu feto iha mundu.
“Feto iha mundu tomak hamriik metin ba futuru komún ida. Iha momentu ida-ne’e, dezafiu kompleksu sira sei nafatin satan dezenvolvimentu ba feto,” Prezidente Xi dehan, iha ninia diskursu durante seremónia abertura Reuniaun Líder Globál kona-ba feto iha Beijing.
Nia observa katak, feto no labarik feto millaun 600-resin iha mundu mak sei moris iha funu no konflitu nia laran, no serka 10% mak moris iha ki’ak no mukit.
Autoridade Xineza ne’e aprezenta proposa haat hodi aselera dezenvolvimentu integrál ba feto iha mundu.
Proposta hirak ne’e ho objetivu hodi kria konsensu ida amplu, loke dalan foun no adota medida konkreta sira hodi promove igualdade jéneru.
Nia subliña, maske progresu barak mak atinji ona maibé dezenvolvimentu feto sei nafatin kontinua hasoru dezafiu ne’ebé kompleksu.
Prezidente Xi ninia proposta dahuluk mak sujere katak mundu presiza asaun konjunta ida hodi kria ambiente di’ak ba kreximentu no dezenvolvimentu feto. “Dezenvolvimenu integrál feto bele sai posível bainhira iha pás no estabilidade,” nia dehan.
Xi mós enfatiza importánsia husi reforsa protesaun ba feto no labarik feto iha rejiaun afetada husi funu, konflitu, katastrofe naturál no ki’ak.
Líder máximu Xinés ne’e husu ba nasaun hotu atu konsolida esforsu sira hodi aselera no hasa’e kualidade feto no mós husu ba mundu atu luta maka’as hodi kombate dezekilibriu no dezigualdade ne’ebé mak satan dezenvolvimentu feto iha nível globál, atu nune’e feto hotu bele hetan benefísiu husi globalizasaun ekonomia.
Ema númeru ida iha Xina ne’e mós subliña importánsia husi inovasaun sientífika no teknológika ne’ebé konsidera nu’udar motor ba empoderramentu feto.
Proposta seluk, Prezidente Xi foku ba reforsu estrutura governasaun hodi proteje direitu no interrese feto, inklui destaka importánsia husi aperfeisoamentu lei no instituisaun, no adosaun polítika ne’ebé asesível no efikás, no aumentu asesu ba servisu saúde no edukasaun ne’ebé kualidade.
Nia sujere atu nasaun promove ambiente sosiál ida-ne’ebé inkluzivu no armoniozu, livre husi diskriminasaun no prekonseitu sira.
Xefe Estadu ne’e enfatiza mós importánsia hosi promosaun kultura respeitu ba feto no transforma igualdade jéneru iha sosiedade hotu.
Ikusliu, nia husu atu komunidade internasional presiza etapa foun ida hodi defende fortalesimentu papél feto iha governasaun internasionál.
Prezidente Xi taka ninia diskursu ho espresa Xina nia apoia tomak ba Organizasaun Nasaun Unida (ONU) hodi fó atensaun ba nesesidade feto iha país adiantadu sira liuhusi estabelesimentu plataforma kooperasaun ida-ne’ebé ampla hodi promove progresu ba feto sira iha mundu tomak.
Iha reuniaun ne’e, Prezidente Xi anúnsia doasaun millaun US$10 ba UN Women Xina no milliaun US$100 ba fundu lideradu hosi Xina hodi aselera dezenvolvimentu feto.
Jornalista: Filomeno Martins
Editór: Rafael Ximenes de A. Belo
