BOBONARU, 16 Outubru 2025 (TATOLI) –Jornalista feto timoroanna’in-tolu husi mídia oioin iha Timor-Leste manan prémiu pestijiadu iha ámbitu komemorasaun loron trajédia Balibo ba da-50 no loron nasionál Liberdade Imprensa tanba sira-nia dedikasaun atu destaka asuntu sosiál sira ne’ebé afeta komunidade vulneravel sira hanesan edukasaun, problema psikososiál, no protesaun labarik.
Prémiu prestíjiu ne’e “Adelino Gomes” – ba produtu jornalístiku di’ak liu iha lian portugés, entrega ba jornalista Antónia Kastono Martins.
Prémiu “Francisco Borja da Costa” – ba traballu jornalístiku di’ak liu kona-ba asuntu sosiál iha imprime ka online, fó ba jornalista Ermelinda Soares, husi órgaun komunikasaun Sosiál SAPNews.
Prémiu “Greg Shackleton” – ba serbisu jornalístiku di’ak liu kona-ba asuntu sosiál iha rádiu ka televizaun, fó ba jornalista Didiana M. dos Reis, husi Rádiu no Televizaun Timor-Leste (RTTL, EP).
“The Best Balibo Five Media Award” – ba produtu jornalístiku di’ak liu iha tinan ne’e, fó ba jornalista Antónia Kastono Martins, husi Diligente.
Prémiu sira ne’e aprezenta hosi Konsellu Imprensa Timor-Leste (CITL, sigla Portugés) nu’udar sinál apresiasaun ba serbisu jornalístiku ne’ebé iha impaktu no étika ida hosi premiadu sira.
Didiana Reis, Jornalista RTTL, afirma katak prémiu ida-ne’e hanesan motivasaun boot ida ba nia ho nia ekipa hodi kontinua programa “Esperansa ba Moris” programa ida-ne’ebé destaka istória husi ema sira ne’ebé moris iha situasaun vulneravel nia laran.
“Prémiu ne’e motiva ha’u ho ha’u-nia ekipa atu kontinua prodú obra ne’ebé lori esperansa ba sira ne’ebé dalabarak la haree. Hanesan mós rekoñesimentu importante ida ba ami-nia servisu maka’as nu’udar jornalista,” Didiana hatete ba TATOLI hafoin simu premiu iha kampu Futeból Balibo, kinta ne’e.
Entretantu Jornalista Diligente Media, Antónia Kastono Martins hato’o ninia emosaun no orgullu tanba manan prémiu rua dala-ida.
Nia koñesidu tanba nia reportajen kle’an kona-ba labarik ida-ne’ebé sofre problema psikososiál, nia família abandona no hetan esplorasaun iha mídia sosiál.
“Ha’u nunka hein atu simu prémiu ida-ne’e. Bainhira rona ha’u-nia naran bolu, ha’u-nia fuan tuku-tuku maka’as. Ida-ne’e maka rezultadu husi serbisu maka’as ho ekipa,” Antónia hatete ho emosaun.
Nia mós hato’o mensajen importante ida ba jornalista feto sira katak keta haluha atu hasoru kestaun sira ne’ebé maka susar.
“Feto sira bele hakerek kona-ba asuntu saida de’it, hanesan mós ho mane sira. Nunka para. Nunka baruk. Kontinua aprende ba malu atu nune’e ita bele hadi’a” nia akresenta.
Jornalista SAPNews, Ermerlinda Soares simu mós prémiu ida tanba nia reportajen kona-ba kondisaun aprendizajen estudante sira-nian iha Luro, Lospalos, ne’ebé tuur de’it iha rai tanba falta fasilidade eskolár.
Reportajen ne’e dudu Ministériu Edukasaun atu fó kedas asisténsia iha forma meza no kadeira sira la to’o fulan ida hafoin istória ne’e publika.
“Ida-ne’e maka prémiu dahuluk ba ami-nia mídia. Ami orgullu tebes, no ida-ne’e motiva ami atu kontinua hato’o lian ba kestaun sira husi komunidade lokál,” Ermerlinda kompromete
Jornalista: Sergio da Cruz
Editór: Rafael Ximenes de A. Belo
