Governu kontinua mellora asesibilidade enerjia eletrisidade iha postu Lolotoe

BOBONARU, 19 Outobru 2025 (TATOLI) –Governu liuhusi Ministéria Obras Públika (MOP) no Eletrisidade Timor-Leste (EDTL, E.P) kontinua mellora asesibilidade enerjia eletrisidade ba benefisiáriu na’ in-310 neʼebé kompostu husi suku tolu, Opa, Guda no Lupa no aldeia lima, Silagol, Dilai, Anon, Gole no Tepa, iha postu-administrativu Lolotoe, munisípiu Bobonaru.

Ministru Obras Publika, Samuel Marçal, hateten atividade ohin ne’e mai atu halo inaugurasaun eletrisidade ba aldeia lima no suku tolu neʼebé mak kompostu husi benefisiáriu na’in 310.

“Maibé ita la’ós de’it atu mai halo inagurasaun, maibé mai para haree ho matan no rona komunidade inklui autoridade lokál sira-nia preokupasaun, eletrisidade ohin bele responde ona, kona-ba bee-moos no estrada nian ita iha hela prosesu atu dezenvolve dezenu Bill of Quantity (BoQ)”, Ministru informa ba jornalista sira iha suku Lupa, Lolotoe, sábadu ne’e.

Governante ne’e hatutan, ho esperansa katak tina oin bele lori ba prosesu aprovizionamentu ba reabilitasaun estrada iha postu Lolotoe, bainhira iha ona prosesu nia laran ona entaun husi parte Atsabe (Ermera) sei liga ba Lolotoe, enkuantu husi Atsabe liga ba Lourba iha ona prosesu nia laran.

“Ohin mós autoridade lokál sira hato’o preokupasaun kona-ba saúde no edukasaun, entaun tuir mai ha’u sei hato’o ba ministéria kompeténsia hodi bele responde tamba iha MOP sei servisu haree liu ba estrada, bee-moos no ahi”, nia afirma.

Prezidente Eletrisidade Timor-Leste, Paulo da Silva, hato’o parabéns ba benefisiáriu sira hotu neʼebé kompostu husi aldeia lima, suku tolu tanba bele asesu ona eletrisidade no rezultadu ida-ne’e esforsu husi servisu koletiva hanesan, EDTL, kompañia, autoridade lokál no komunidade sira.

“Agradese ba autoridade lokál no komunidade sira bele koopera hodi implementa obra ida ne’e liuliu komunidade sira neʼebé oferese sira-nia ai-horis atu ita konklui obra ida ne’e ho di’ak”, Prezidente EDTL, hato’o.

Tanba ne’e nia husu ba autoridade lokál sira hotu katak karik aldeia balun neʼebé seidauk asesu ba enerjia eletrisidade bele informa ba EDTL munisípiu haruka ba nasionál atu tau iha planu tanba iha Governu da-sia nian programa sei tau prioridade ba nível aldeia sira.

“Ha’u mós hakarak hato’o mensajen balun oinsá uza enérjia eletrisidade ne’e ho didi’ak tamba enerjia elétrika neʼe mós lori dezastre ba ita bainhira ita uza la ho kuidadu”, nia apela.

Administradór postu Lolotoe neʼebé reprezenta Prezidente Autoridade Munisípiu Bobonaru, Sebastião Amaral, hateten komunidade sira-nia preokupasaun ne’e maka infraestrutura bázika hanesan, eletrisidade, bee-moos no estrada, maibé ohin loron Governu inaugura ona eletrisidade iha suku ida ne’e.

“Entaun komunidade sira bele asesu ona ahi, maibé presiza tau atensaun mós ba kondisaun estrada, ohin ministru mós haree rasik ho matan katak, kondisaun estrada ne’e aat hahú iha parte Lontas no seluk tan mak bee-moos, maibé iha ona prosesu ba tinan oin.

Nia dehan, kestaun hirak ne’e hotu sei iha prosesu nia laran tanba Governu da-sia la’ós halo milagre ba buat hotu bele mosu maibé tenke la’o neneik, loron ida kondisaun estrada sei di’ak no sei halo mellora fornesimentu bee-moos ba komunidade sira.

Reprezentante komunidade iha aldeia Dilai, Paulino Afonso, hateten lori komunidade hotu nia naran hato’o agradese ba Governu tanba durante tinan barak sira seidauk asesu ba enérjia eletrisidade tamba aldeia neʼebé izoladu dook husi sidade.

“Ami sei tau atensaun ba mensajen neʼebé ohin governante sira hato’o atu kuidadu sasan Estadu nian ho di’ak hodi labele hamosu dezastre, maibé ami nafatin presiza bee-moos no estrada tamba bainhira kondisaun estrada di’ak ami povu moris di’ak bele lori ami-nia produtu lokál ba fa’an iha merkadu”, nia garante.

Maibé nia konsidera katak bainhira kondisaun estrada seidauk di’ak entaun sira sei nafatin sente terus maske sira asesu ona ba bee-moos no enerjia elétrika.

Projetu halo melloria ba enérjia eletrifikasaun ne’e implementa hosi kompañia Luan Tasi unip. Lda no Em Jv Hahi Nea Ria unip. Lda, durante fulan neen, implementasaun iha suku lupa ho montante $501,549.76, enkuantu implementasaun iha suku Opa no Guda ho montante orsamentu hamutuk $261,301.28, no totál orsamentu ba projetu ne’e hamutuk $762,851.04.

Atividade inagurasaun ne’e marka prezensa husi entidade Governu, autoridade seguransa PNTL no F. FDTL, autoridade lokál no mós komunidade sira.

Jornalista: Alexandra da Costa

Editór: Rafael Ximenes de A. Belo