Governu aprova nota entendimentu entre TL-Malázia mellora operadór sistema komunikasaun
DILI, 22 Outubru 2025 (TATOLI)—Governu aprova proposta memorandu entendimentu ida entre Governu Repúblika Demokrátika Timor-Leste no Governu Malázia kona-ba kooperasaun telekomunikasaun iha ámbitu antes Timor-Leste nia adezaun ba Asosiasaun ba Nasaun Sudeste Áziatiku (ASEAN) iha loron 26 Outubru 2025 iha Malázia.
Proposta ne’e aprezenta husi Ministru Transporte no Komunikasaun, Miguel Marques Gonçalves Manetelu, iha reuniaun Konsellu Ministru ne’ebé hala’o iha Palásiu Governu, kuarta ne’e.
Ministru Transporte no Komunikasaun, Miguel Gonçalves Manetelu, hateten memorandu ida ne’e inisiativa ida husi Governu Timor-Leste no Malazia nian hafoin iha vizita husi Primeiru-Ministru Malázia, Dato Seri Anwar Ibrahim, mai iha Timor ne’ebé akompañia husi Ministériu Komunikasaun, nune’e iha reuniaun bilaterál xefe Governu Malázia husu atu hametin setór telekomunikasaun hodi asina memorandu ida antes Timor-Leste festeza nia adezaun ba ASEAN.
“Tamba daudaun ne’e aviaun Malázia nian mós hahú espanda nia voo iha Timor-Leste, entaun ema husi Malázia mós sempre mai vizita Timor. tanba ne’e pasu dahuluk ita sei halo roaming teknikamente, ita sei uza operadór (SIM Card) hanesan Telkomsel, Telmor no Timor Telekom iha Malázia,” Ministru ne’e informa ba jornalista sira iha Palásiu Governu, ohin.
Aleinde ne’e, nia hatutan husi parte Malázia nian mós bele uza sira-nia operadór telekomunikasaun iha Timor, nune’e ida-ne’e mak ohin aprezenta no Konsellu Ministru mós halo apresiasaun no aprova proposta ida ne’e hodi asina iha loron 26 fulan-Outobru 2025 iha Malázia.
Bazeia ba dokumentu ne’ebé Ajénsia Tatoli asesu iha portál Governu afirma katak, memorandu Entendimentu ne’e ho objetivu atu hametin kooperasaun bilaterál iha setór telekomunikasaun, neʼebé kobre infraestrutura, servisu no asuntu regulatóriu, bazeia ba resiprosidade no benefísiu mútuo.
Entre área prinsipál sira kooperasaun nian mak interkámbiu koñesimentu tékniku no prátika di’ak, kapasitasaun institusionál, promosaun peskiza no inovasaun teknolójika, no mós fasilitasaun parserias entre entidade reguladora, operadór no ajente sira setór ne’e nian hosi nasaun rua ne’e.
Akordu ne’e mós prevee programa formasaun, workshop no interkámbiu tékniku, hodi kontribui ba dezenvolvimentu setór telekomunikasoins neʼebé modernu, seguru no efisiente liu, ne’ebé esensiál ba progresu ekonómiku no prosesu integrasaun rejionál Timor-Leste nian iha espasu ASEAN.
Jornalista : Alexandra da Costa
Editór : Cancio Ximenes
