Janeiru-Outubru, ANLA fó lisensa ambientál ba empreza 537
DILI, 22 Outobru 2025 (TATOLI)—Autoridade Nasionál ba Lisensiamentu Ambientál (ANLA) konsege fó ona lisensa ambientál ba empreza hamutuk 537 hahú fualn-Janeiru to’o fulan-Outubru.
Prezidente Autoridade Nasionál ba Lisensiamentu Ambientál, Maximiano de Oliveira, hateten empreza sira ne’ebé hetan lisensiamentu ba ambientál hamutuk 537 ne’e kompostu husi kategória A B no C, mak hanesan kompañia ne’ebé loke negósiu kona-ba ospitalidade, indústria no seluk tan.
“Dadus hirak-ne’e bainhira ami halo rejista hahú husi fulan-Jeneiru to’o Outobru ne’e kobre ba territóriu tomak,” Prezidente ANLA hateten ba jornalista sira iha Santa Cruz, tersa ne’e.
Dirijente ne’e dehan, empreza hotu-hotu tenke iha jestaun, maibé depende ba empreza ida-idak nia maneira, no tau lixu tuir nia fatin.
“Ami koordena ho komunidade no autoridade lokál sira atu nafatin fo informasaun mai ami, tamba ami iha limitasaun ema no fasilidade labele kobre hotu iha territóriu tomak,” nia hateten.
Ba empreza hirak ne’ebé viola regra ambientál sei aplika suspensaun bazeia ba artigu 39/2022 kona-ba lisensiamentu ambientál no iha artigu 34 lei baze ambientál sei fó sansaun ka koima ho montante rihun $5 to’o rihun $50.
Maibé kona-ba selu multa du’urante ne’e seidauk akontese no ANLA foin fó de’it notifikasaun hodi sama-atensaun ba empreza sira labele viola regulamentu ambientá.
Jornalista : Alexandra da Costa
Editór : Cancio Ximenes
